Бәхетле ҡартлыҡ кисерә

Нәҡиә өләсәйем һигеҙ йәшендә Ҡуянбай­ҙағы белем усағына уҡырға бара. Дүртенсене бөтөргәс, Яратҡол ауылында, унан Ҡолойҙа мәктәпте тамамлай. Ҡайҙа уҡыһа ла, тик «бишле»гә генә өлгәшә. 1962 йылда Баш­ҡорт дәүләт университетына уҡырға инә. Унда ла бик тырышып белем ала.
Юғары уҡыу йортон тамамлағас, өләсәйемде Әбйәлил районы Таштимер ауылына химиянан уҡытыусы итеп ебәрәләр. Шунда ул беҙҙең олатайҙы – Урал Зияй улы Ғайсинды осрата. Күп тә үтмәй, йәштәр бер-береһен яратып, өйләнешеп тә ҡуялар. Оҙаҡ йылдар Таштимерҙә эшләгәндән һуң, партия уларҙы Салауат мәктәбенә, унан Байым мәктәбенә эшкә юллай. Олатайым директор ҙа, физика-математика уҡытыусыһы ла була, өләсәйем иһә химия-биология уҡытыусыһы, директор урынбаҫары вазифаларын башҡара. Эштәрендә икеһе лә һынатмай. Үҙҙәрен ихтирам итәләр.
Өләсәйем эшен бик ярата, үҙенең белемен балаларға еткерергә, бирергә тырыша. Уҡыу­сылары юлын дауам итеүе – уның өсөн ҙур ҡыуаныс. Үҙе Рәсәй Федерацияһының мәғариф алдынғыһы, хеҙмәт ветераны, бик күп наградаларға ла лайыҡ була.
Өләсәйем менән олатайым ике бала – Салауат һәм Миләүшәне тәрбиәләп үҫтерә. Хәҙер улар ҙа үҙ аллы донъя көтә.
Әле беҙ Асҡар ауылында йәшәйбеҙ. Өләсәйемә 79 йәш тулды. Балалары, ейән-ейәнсәрҙәренең нурҙарына күмелеп, бәхетле ҡартлыҡ кисерә. Беҙ уны яратабыҙ, оҙон ғүмер, тик изгелек кенә теләйбеҙ.

Мораҙым ҒАЙСИН, йәш хәбәрсе.
Әбйәлил районы,
Асҡарҙағы
Таһир Күсимов исемендәге гимназия.