+11 °С
Болотло
Бөтә яңылыҡтар
Общие статьи
4 Май 2019, 06:12
Виртуаль ысынбарлыҡты гиҙеп
Һуңғы ваҡытта виртуаль ысынбарлыҡ хаҡында күп һөйләйҙәр. Бигерәк тә малайҙарҙың иҫе китә. Уның махсус күҙлеген кейеп, мауыҡтырғыс уйын донъяһына сумыу, кинофильм ҡарап, тормоштағы ысынбарлыҡ кеүек, үҙҙәрен шунда һымаҡ хис итеү уларға айырыуса ҡыҙыҡ тойола.
Ә бына ошо йүнәлештә түңәрәктә шөғөлләнгәндәр виртуаль донъяны үҙҙәре булдырырға өйрәнә. Баш ҡалабыҙҙың «Башҡортостан кванториумы» республика балалар һәм үҫмерҙәр технопаркында эшләп килгән берекмәгә йөрөүселәр, мәҫәлән.
– Быйылғы уҡыу йылында ҡоролмабыҙ булғас, ошондай түңәрәк ойошторорға ҡарар иттек. Виртуаль донъяны булдырыр өсөн иң беренсе уны нисек итеп эшләү юлын уйлап табырға, был объектты тыуҙырыу өсөн график мөхәррирҙәрҙе, шул уҡ ваҡытта 3D моделдәр эшләү программаларын белергә кәрәк. Өйрәнеүҙе иң ябайҙарынан – Bryce, Blender-ҙан башлағайныҡ, унан 3DS Мax-ҡа күстек. Ул – киң билдәле профессиональ мөхәррир. Бына шулай күп программалар, программалау серҙәре менән танышабыҙ. Юниттар (компьютер уйындарындағы персонаждар) менән эш итеү, уларҙы төрлөсә күсереү, әҙерҙәренә сценарийҙар өҫтәү ҙә балалар өсөн бик мауыҡтырғыс. Хайуан, ҡоштарҙы эшләп, уларҙы төрлөсә ҡыбырлатырға, хәрәкәтләндерергә лә өйрәнәбеҙ, – ти виртуаль һәм өҫтәмә ысынбарлыҡ берекмәһе етәксеһе Оксана Остапчук.
Беҙ эштең ҡыҙыу мәленә тура килдек, уҡыусылар тырышып-тырмашып филдең 3D моделен яһау менән мәшғүл ине. Ә Scratch программаһы ярҙамында уйындар эшләргә оҫтарып алған 1-се лицейҙың V «Б» синыфы уҡыусыһы Павел Комарницкий һаман үҙенең яратҡан шөғөлөнән айырыла алмай.
– Үҙем уйлаған 13 уйыным бар инде. Уларҙы ошо уҡ программала һаҡлайым. Башҡалар ҙа уйнаһын, ҡараһындар өсөн инергә лә рөхсәт ҡуйҙым. Ә быныһы – математик уйын. Герой хәрәкәтләнһен өсөн төрлө ғәмәлдәрҙе сисә барырға кәрәк, – тип йылмая малай.
Әгәр ҙә йәш виарщиктар яйлап-яйлап моделдәр – Fab-тар эшләргә өйрәнһә, уларҙы интернет-магазиндарға ҡуйып, үҙҙәре лә һата ала, ти етәксе апайҙары. Шәп, эйе бит? Түңәрәккә йөрөгән бер егет шулай үҙенә күпмелер аҡса ла эшләргә өлгөргән.
Оксана Викторовна виртуаль ысынбарлыҡ менән шөғөлләнеүселәрҙе бер үк ваҡытта хайуандарҙы өйрәтеүсе лә, жонглёр ҙа, акробат та булған цирктағы клоун менән юҡҡа сағыштырмаған икән. Ысынлап та, бында эшләй белер өсөн дизайнер, программалаусы кеүек күп һөнәр нигеҙҙәренә эйә булырға кәрәклеген аңланыҡ. Балаларҙың түңәрәктә алған белемдәре үҫеш өсөн дә, бәлки, кемгәлер киләсәктә яратҡан һөнәрен табырға ла ярҙам итәсәк әле.
Гөлназ ШӘЙХЕТДИНОВА.
Өфө ҡалаһы.
Читайте нас в
Гәзитебеҙ - дуҫыбыҙ
Күңелдәрҙең иләҫ-миләҫ сағы
1930 йылдың 12 февраленән нәшер ителә. Ойоштороусылары: Башҡортостан Республикаһының Матбуғат һәм киң мәғлүмәт саралары агентлығы, Башҡортостан Республикаһының «Башҡортостан Республикаһы» нәшриәт йорто дәүләт унитар предприятиеһы. Баш мөхәррире — Мирсәйет Ғүмәр улы Юнысов.
Башҡортостан Республикаһы буйынса элемтә, мәғлүмәт технологиялары һәм киңкүләм коммуникациялар өлкәһендә күҙәтеү буйынса федераль хеҙмәт идаралығында 2015 йылдың 18 авгусында теркәлде. Теркәү номеры — ПИ №ТУ02-01403.
Республиканский информационный центр – филиал государственного унитарного предприятия Республики Башкортостан Издательский дом «Республика Башкортостан».
Р./счёт 40602810200000000009 в Филиал ПАО «БАНК УРАЛСИБ» в г.Уфа, БИК 048073770, ИНН 0278066967, КПП 027843012, к/с 30101810600000000770.
Телефон
8 (347) 273-36-64, 89170477422.
Электрон почта
Адресы
450079, г. Уфа, ул. 50 летия Октября, 13, 8-й этаж