+10 °С
Болотло
TelegramЕңеү – 77!VKOKTikTok
Бөтә яңылыҡтар
Еңеү – 77!
9 Май , 10:35

Еңеүҙең етмеш етенсе яҙын ҡаршылай

Быйыл Бөйөк Еңеүҙең 77 йыллығын билдәләйбеҙ. Йылдар үтеү менән йәндәрен аямай илебеҙ азатлығы өсөн көрәшкән хөрмәтле ветерандарыбыҙҙың сафы һирәгәйгәндән-һирәгәйә бара. Хәйбулла районында ла улар икәү генә ҡалған. Шуларҙың береһе – Аҡъяр ауылынан Иҙрис Әбделкәрим улы Түләшев. 97-се йәше менән барған ветеран Еңеүҙең 77-се яҙын ҡаршылай.

Еңеүҙең етмеш етенсе яҙын ҡаршылай
Еңеүҙең етмеш етенсе яҙын ҡаршылай

Ул 1925 йылдың 18 июлендә Йылайыр районы Һабыр ауылында тыуған. Биш йәшенән Хәйбулла районы Иләc ауылындағы туғандары ҡарап үҫтерә. Немец илбаҫарҙары ба­ҫып ингәндә уға 16 йәш була. Колхозда хисапсы, ауыл советы сәркәтибе булып эшләй. 1943 йылда хәрби хеҙмәткә саҡырыла. Иҙрис Түләшев хәҙерге Ырымбур өлкәһендәге Чкалов хәрби пуле­мёт училищеһында уҡый, шунан уны һауа-десант ғәскәрҙәре сафына алалар. 1944 йылда яуға инә. Көнбайыш Украина, Молдавия, Румыния аша һу­ғыш юлдарын үтә. Ике тапҡыр яралана, дауаланып яңынан сафҡа баҫа. Венгрияны азат итеүҙә ҡатнаша. Ә Еңеүҙе Чехословакияла Праганан йыраҡ түгел ерҙә ҡаршылай.
Һуғыштан һуң тағы 4 йыл Тулала һауа-десант ғәскәрҙәрендә хеҙмәт итеп, 1949 йылда ғына Башҡортостанға ҡайтыу бәхете тейә. Иҙрис Түләшев тыныс тормошта ғүмеренең күп йылдарын район матбуғатына бағышлай: «Хеҙмәт байрағы» гәзитендә яуаплы сәркәтип, мөхәррир урынбаҫары булып эшләп, хаҡлы ялға сыға.
Тормош иптәше менән өс бала тәрбиәләп үҫтерәләр. Иҙрис Әбделкәрим улы әүҙем тормош алып бара, йәш быуын менән осрашыуҙарҙа ҡатнаша, уларҙа илһөйәрлек тойғоһо тәр­биәләй. Районда үткән шахмат ярыштарын ҡалдырмай.
Бөйөк Ватан һуғышы ветеранының күкрәген бик күп наградалар биҙәй. I дәрәжә Ватан һуғышы ордены, «Хәрби хеҙмәттәре өсөн», «Германияны еңгән өсөн», «Венаны алған өсөн», шулай уҡ өлгөлө хеҙмәте өсөн ике тапҡыр «Хеҙмәт батырлығы өсөн», юбилей миҙалдарына лайыҡ була.
Иҙрис Түләшев – БАССР-ҙың атҡаҙанған мәҙәниәт хеҙмәткәре, Рәсәй һәм Башҡорт­остандың Журналистар союзы ағзаһы.
Хөрмәтле ветеранды яҡынлашып килгән Бөйөк Еңеү байрамы менән ҡотлайбыҙ, ныҡлы һаулыҡ, оҙон ғүмер теләйбеҙ.

Э. ҒӘЛЛӘМЕТДИНОВА.

Еңеүҙең етмеш етенсе яҙын ҡаршылай
Еңеүҙең етмеш етенсе яҙын ҡаршылай
Автор:"Йәншишмә" гәзите
Читайте нас в