Бәләкәй генә, әммә ыҡсым бүлмә. Әсәй ҡулы менән биҙәлеп тегелгән тәҙрә ҡорғандары, атайҙың китаптары тулы кәштә. Төн ҡараңғылығы бар донъяны йоҡоға сумдырғандай. Әсәй бер йәшлек Илдар ҡустымды ҡосҡан да, йоҡоноң илаһи көсөнә иҙрәп, тәмле төштәр күрә. Бәләкәй мейес алдындағы өҫтәлдә лампа яна. Атайҙың бармаҡтары етеҙ йүгереп, машинка хәрефтәре өҫтөнә баҫа. Туҡ-туҡ-туҡ... Беҙ был тауышҡа күптән өйрәнгән, күнеккән, күңелгә яҡын булып һеңгән. Туҡ-туҡ-туҡ... «Башҡортостан» тип аталған был ҡара төҫлө механик машинка өйҙә иң ҙур әйбер һанала. Ауылдарҙа әбей-бабайҙарҙың серле, үҙҙәре өсөн хазина һандығы нисек булған, шундайыраҡ, юҡ, унан да ҡәҙерлерәк йыһаз ул. Атай ижад емештәрен ҡағыҙға төшөрә тора, машинка туҡылдай бирә. Беҙ иһә был тауышты ла ишетмәйбеҙ, уның уй-хистәре урғылыуын да белмәйбеҙ.
Атайым үҙ ҡулдары менән бүрәнәнән һалған өй ҙә ҙур түгел ине. Ләкин атай йортонан да ҙурыраҡ, шулай уҡ уның һалған мейесе усағынан да йылыраҡ, ошо өй эсен йәмләп, нурлап тороусы әсәй, атай ҡарашынан да, икеһенең дә бер-береһенә ҡарата мөнәсәбәтенән дә ҡәҙерлерәк ни бар һуң бала өсөн был донъяла?!
Атайым менән әсәйем 1953 йылда матур көндәрҙең береһендә осрашҡан. Мәжит Ғафури исемендәге Башҡорт дәүләт академия драма театрында барған «Еҙнәкәй» спектаклендә Ким тигән егет һылыу Рәйфәгә күҙ һала. Бер нисә көндән һуң егет ҡыҙҙы эҙләп табып, танышалар. Икеһе лә йәш, сибәр, һылыу, икеһе лә – студент. Шулай улар осраша башлай. 1955 йылда атайым университетты тамамлағас, туй яһап, өйләнешәләр.
«Һәләтле кеше бөтә эштә һәләтле» тигән һүҙҙәр тап атайым тураһында. Отпуск ваҡытында күрше ағай ярҙамы менән бура бурап, өй һалалар. Ошо изге йортта мин донъяға килгәнмен, Илдар ҡустым тыуған. Атайымдың, ауыл балаһының, ҡулынан килмәгән эш юҡ ине. Үҙе лә тынғыһыҙ булды: төндәрен ижад итә, таңдан утын яра, һыу ташый, мейескә ут яға – ғаилә усағына әленән-әле ҡуҙ өҫтәп тора. Һуңынан инде үҙе эшләгән СССР Фәндәр академияһының Башҡортостан филиалы Тарих, тел һәм әҙәбиәт институтына юллана.
* * *
Атайым иҫән саҡта беҙҙең фатир дуҫтарынан, ҡәләмдәштәренән өҙөлмәне. Әсәйем дә уларҙы ихлас ҡаршыланы. Шағирҙар Ғәлим Дәүләтов, Әсхәл Әхмәтҡужин, яҙыусы Ноғман Мусин, әҙәбиәт белгестәре Суфиян Сафуанов, Вафа Әхмәҙиев, Морат Рәхимҡолов... Йөҙҙәрендә ихласлыҡ, илаһи бер нур сағылыр, бәхәскә ингәндә күҙҙәрендә осҡондар уйнар ине. Фекерҙәштәрҙең аралашыуы шатлығын беҙ ҙә күрә, тоя инек. Бар фатир эсе мөғжизәгә тула тиерһең. Был мөғжизә – әҙәбиәт, үҙе бер ҙур, серле донъя! Ул саҡтарҙы, дәүерҙе «60-сы йылдар энергетикаһы» тип тә атарға мөмкин. Һуңынан белеүемсә, ХХ быуаттың ошо 60-сы йылдары бар донъяла әҙәбиәттең, фәндең күтәрелеш осоро булған икән. Нәҡ ошо йылдарҙа атайым «Әҙәбиәт теорияһы» тигән фундаменталь хеҙмәт тураһында уйлап йөрөгән һәм оло эшкә тотонған. 1971 йылда Ким Әхмәтйәновтың ошо оло хеҙмәте баҫылып сыҡҡан һәм шунда уҡ йәмәғәтселектең юғары баһаһын алған «Әҙәбиәт теорияһы» филология фәне ҡаҙаныштарының береһен тәшкил итә. Был китабы өсөн 1972 йылда Ким Әхмәтйәновҡа Башҡортостандың Салауат Юлаев исемендәге дәүләт премияһы бирелде. Әҙәбиәтселәрҙән республикабыҙҙың иң ҙур премияһының беренсе лауреаты ул булды. Атайымдың «Әҙәбиәт теорияһы» күп яҙыусыларҙың өҫтәл китабына әйләнде, юғары уҡыу йорттарында белем алыусы студенттарға, уларҙың уҡытыусыларына, әҙәбиәтте баһалаусыларға һәм һөйөүселәргә уның өйрәнеү серҙәрен асыуҙа ныҡлы терәк булды. Быларҙан тыш, атайым, әҙәбиәттең киләсәк быуынды тәрбиәләүҙә ҙур роль уйнауын иҫәпкә алып, бар ғүмере буйына башҡорт мәктәптәре өсөн туған әҙәбиәт буйынса дәреслектәр, хрестоматиялар әҙерләүҙә ҡатнашты, ошо изге эштең уртаһында ҡайнаны. Шулай уҡ башҡорт әҙәбиәте уҡытыусылары өсөн программалар төҙөнө.
* * *
Атайымды гел республика ҡалаларында балаларҙың үҙ туған телендә уҡый алмауы борсоно. 1965 йылда I синыфҡа 1-се интернат-мәктәпкә (хәҙерге Рәми Ғарипов исемендәге 1-се республика башҡорт интернат-гимназияһы) алып барҙы. Күңелдә шатлыҡ урғыла. Юл ыңғайы атайым ҙур гөлләмә алып бирҙе. Күҙҙең яуын алып торған хуш еҫле сәскәләрҙе ике ҡуллап тотҡанмын. Шатлығымдың, хистәремдең сиге юҡ!
1970 йылда Өфөлә башҡорт теле һәм әҙәбиәте уҡытҡан тәүге урта мәктәп асылды. Ул 20-се мәктәп Достоевский урамында урынлашҡайны (хәҙерге Фатима Мостафина исемендәге 20-се башҡорт гимназияһы). Был мәктәпте асыр өсөн башҡорт теле, тимәк, халҡы яҙмышы өсөн янып йөрөгән кешеләрҙән бик күп көс талап ителде. Маҡсаттарына ирешер өсөн бик ҙур тырышлыҡ һалдылар, ҡыйыу булдылар, юлдарынан тайпылмайынса барҙылар. Ә бит ул заманда бының өсөн эшеңдән генә ҡалыу түгел, башҡа «сара» ла күрергә мөмкин ине. Хәҙер быға ышаныуы ҡыйын, заманалары шулай ине. Беҙ был кешеләр менән ғорурланабыҙ. Мин икеләтә ғорурланам: улар араһында атайым – Ким Әхмәтйәнов та бар ине!
1966 йылда һеңлем Зифа тыуҙы. Атай-әсәйҙең шатлығының сиге булманы. Атайым эшләп арыһа ла, бәләкәсе эргәһенән китмәне.
* * *
Изге Әбйәлил ерендә, ата-бабаһының төйәгендә – «Ирәндек ҡуйынында, Ҡыҙыл һыуы буйында»ғы атаҡлы Әлмөхәмәт ауылында тыуып, әсә һөтө менән ҡанына халҡының гүзәл туған телен, моңон һеңдергән ул. Әсәһенең сәңгелдәк йыры, һуңынан башҡорт халыҡ йырҙары бала саҡтан әсир итә. Бәләкәйҙән тыуған төйәгенең хозурлығына ғашиҡ була, ауыл кешеләрен яратып үҫә.
Тыуған ауылында ете йыллыҡ мәктәпте «бишле»гә генә тамамлап, ун дүрт йәшлек үҫмер көйө генә оло юлға сыға. Һуғыштан һуңғы ауыр йыл була ул: 1946 йылда атаһы йортонан етмеш саҡрымда ятҡан Темәс педагогия техникумына уҡырға инә. Үҙе өсөн әкиәттәгесә «серле һандыҡ» ҡапҡасын – шиғриәт донъяһын аса. Артабан иһә ғүмерен әҙәбиәт менән шиғриәткә арнай. Техникумда әҙәби түңәрәктең рәйесе лә була ул. Нәҡ ошонда уның күңеленә шиғриәт матурлығының серҙәрен асыуға, ҡанундарын белергә ынтылыуға орлоҡ һалына ла инде. Ошондай ниәте шытым бирә, бөрөләнә. Яҙмышын билдәләгән йондоҙона – Шиғриәт һәм Әҙәбиәткә табан атлай.
Әҙәбиәт һәм тел институтында ул Әхнәф Харисов, Ғилемдар Рамазанов, Ғайса Хөсәйенов, Әнүр Вахитов, Суфиян Сафуанов, Салауат Ғәлин, Зиннур Ураҡсин, Марат Минһажетдинов, Нур Зарипов, Рауил Бикбаев, Ғиниәтулла Ҡунафин, Мирас Иҙелбаев, Рәшит Шәкүров, Әхәт Вилданов һымаҡ әҙәбиәт һәм тел белгестәре, халҡыбыҙҙың арҙаҡлы шәхестәре менән бергә эшләй. Нәҡ улар үҙҙәренең фәнни хеҙмәттәре менән башҡорт әҙәбиәтен өйрәнеүҙә күп көс һалды, байытты.
Фән өлкәһендә танылыу алһа ла, атайым ябай кеше булып ҡалды, һис ҡасан үҙен башҡаларҙан юғары тотманы. Уны дан да, юғары вазифалар ҙа, партияла тороу ҙа ҡыҙыҡһындырманы. Ул яҙыр өсөн йәшәне, үҙ алдына һорауҙар ҡуйҙы – шуға дөрөҫ яуап эҙләне, асылын тапты. Виктор Гюго һүҙҙәре менән әйткәндә, хәҡиҡәттең юғары нөктәһе – матурлыҡ, атайым да матурлыҡҡа ынтылды. Ул һәр саҡ йәш һәм башлап ҡына тороусы авторҙарға иғтибарлы булды, әҫәрҙәрен анализланы, кәңәштәр бирҙе. Тәжрибә туплаған һайын үҙе лә әҙәбиәттә йәштәрҙең остазына әйләнде.
Ниндәй генә фәнни хеҙмәт өҫтөндә эшләмәһен, ул һәр ваҡыт Ким Әхмәтйәнов булып ҡалды: йәмәғәт эштәрендә ныҡ әүҙем ҡатнашты. Башҡортостан делегацияһы менән Мәскәүгә, Ленинград, Ҡазан, Дүшәмбегә барҙы. Доклад менән съездарҙа, юбилей кисәләрендә, мәктәптәрҙә, республика баҫмаларында сығыш яһаны. 1976 йылда атайым докторлыҡ диссертацияһын тамамланы. Темаһы «Поэтик образлылыҡ» тип атала ине. Ләкин рецензенттар тарафынан яҡшы фекерҙәр булһа ла, докторлыҡ диссертацияһын яҡлауҙы бер нисә йыл кисектереп килделәр.
1978 йылда ул Башҡорт дәүләт университетына доцент булып, башҡорт әҙәбиәт теорияһы буйынса лекциялар уҡыуға күсте. Ким Әхмәтйәновтың һабағын тыңларға студенттар бик теләп йөрөнө. Семинарҙарҙан, лекцияларынан бушаған арала әҙәбиәт буйынса эҙләнеүҙәрен, фәнни хеҙмәттәр яҙыуын дауам итте. БДУ-ла эшләгән сағында ысын мәғәнәһендә педагогик һәләте асылды.
* * *
Нисәмә йыл үтһә лә, беҙ уны юҡһынабыҙ. Етемлек тойғоһо эҙәрлекләп барған төҫлө – һаман үтмәй. Иҫтәлектәр яҙыуы ла ауыр, иҫкә төшкән һайын ҡыйын булып китә. Атайым – беҙҙең ғорурлыҡ та, йөрәк әрнеүе лә. Аранан китеүенә күп ваҡыт үтһә лә, уның һәр саҡ беҙҙең арала булыуын тоябыҙ. Балаларым, ейәнсәрҙәрем олаталарының кем икәнен яҡшы белә. Әбйәлилдәр уны онотмай, күренекле яҡташтарының иҫтәлеген ҡәҙерләп һаҡлай; 1992 йылда Ким Әхмәтйәнов исемендәге премия булдырҙылар. Был премия әҙәбиәт, сәнғәт һәм журналистика өлкәһендәге иң яҡшы әҫәргә бирелә. 2013 йылда Әлмөхәмәт ауылы мәктәбенә төкәтмә һалынып, унда Ким Әбүзәр улы Әхмәтйәновҡа, Рамаҙан Ғимран улы Өмөтбаевҡа, Рәмил Хөснөтдин улы Дәүләтҡоловҡа (Ҡол-Дәүләт) арналған музей асылды. Әлмөхәмәт ауылында, район үҙәге Асҡарҙа Ким Әхмәтйәнов исемендәге урамдар барлыҡҡа килде. Асҡарҙағы тыуған яҡты өйрәнеү музейында Ким Әхмәтйәновтың ижадына, тормошона арнап айырым стенд, мөйөш булдырылды.
(Ҡыҫҡартып баҫылды.)
Гөлшат ҒӘБИТОВА (ӘХМӘТЙӘНОВА).