– Тыуған яғым Әлшәй районынан махсус хәрби операцияла ҡатнашҡан һалдаттарҙың балаларына 3 дана «Йәншишмә» гәзитен яҙҙырығыҙ әле, зинһар, – тип аҡсаһын сығарып та һалды.
Шунан тағы дауам итеп:
– Яҡташтарымдан ишетеүемсә, һалдаттар ҡулъяулыҡтар ҙа һорағандар икән. Шуларҙы ла ебәрергә ине, – тине.
Ул көндө редакцияға «Йәншишмә»беҙҙең ветераны, шағирә Зөһрә Ҡотлогилдина ла килгәйне.
– Әйҙәгеҙ, Гөлфиә апай, һеҙҙең башланғыс менән гәзиттә акция иғлан итәйек. «Йәншишмә» уҡыусылары, әсәйҙәр, атайҙар, уҡытыусылар, өләсәйҙәр һалдаттарға ҡулъяулыҡтар йыйып ебәрәйек, – тине ул. – Бәлки, кемдәрҙер матур итеп сигеп тә әҙерләр. Ҡулъяулыҡ менән генә сикләнмәйек. Шулай уҡ йылы ойоҡбаштар, бейәләйҙәр, кәрәкле гигиена әйберҙәре лә туплайыҡ. Байрам күстәнәсе итеп боҙолмай торған ризыҡтар, татлы күстәнәстәр ҙә һалайыҡ. Уҡыусылар изге теләктәрен хаттарға ла яҙыр, һүрәттәр ҙә төшөрөп ебәрер. 23 февралгә ағайҙарына, атайҙарына матур бүләк булыр.
Ысынлап та, был эште оҙаҡҡа һуҙмайынса каникул көндәрендә башлап ебәрһәгеҙ ҙә мөмкин. Редакцияла тупланған әйберҙәрҙе беҙ айырым ҡапҡа тултырып, тышына «Республика балалар һәм үҫмерҙәр гәзите «Йәншишмә» уҡыусыларынан – Миңлеғәле Шайморатов, Александр Доставалов, Салауат Юлаев исемендәге батальон һалдаттарына» тип яҙып, Өфөләге Берҙәм логистика үҙәгенә алып барып тапшырырбыҙ.
...Бөйөк Ватан һуғышы йылдарында ла республикабыҙ балалары фронтҡа ярҙам итеп, металл һыныҡтары йыйған. Шуларҙан «Башҡортостан пионеры» тигән танк һәм самолёт төҙөлгән. Әле лә ҡулыбыҙҙан килгән ярҙамды күрһәтергә бурыслыбыҙ. Илебеҙҙә тыныслыҡ булһын, һалдаттар иҫән-һау тыуған яҡтарына әйләнеп ҡайтһын өсөн үҙ өлөшөбөҙҙө индерәйек!
Был изге эшкә «Йәншишмә»нең элекке йәш хәбәрселәрен дә ҡатнашырға саҡырабыҙ. Ауылдағы фермерҙар һәм эшҡыуарҙар ҙа ситтә ҡалмаһын ине. Аҡсалата ярҙам күрһәтһәләр, беҙ үҙебеҙ күмәртәләп һатыу нөктәләренән кәрәкле әйберҙәрҙе туплай алабыҙ.
Шулай итеп, «Ҡулъяулыҡ» акцияһы старт алды!
«Йәншишмә» гәзите редакцияһы.