Мәктәбебеҙҙә «Сәләмәт быуын – көслө төбәк» проекты буйынса «Яңы 2022 йылда – ғаилә уйындары» тигән фестиваль үтте. Был сарала быйыл да беҙҙең III cиныф уҡыусылары атай-әсәйҙәре менән бик әүҙем ҡатнашты. Улар өсөн «Атай, әсәй һәм мин – спорт ғаиләһе» ярышы ойошторолдо. Бергәләп саңғыла, тюбингта шыуҙылар, гөж килеп арҡан тартыштылар. Атайҙарҙың хоккей уйнағанын күрһәгеҙ икән?! Уларҙың сәмләнеп алышҡандарын ҡыҙыҡһынып ҡарап торҙоҡ.
Бына иң-иңдәрҙе билдәләр ваҡыт етте. I урынды Хәсәновтар ғаиләһе алһа, II урын – Әбләевтәр ғаиләһендә, ә III урынды Ситдиҡовтар ғаиләһе яуланы. Еңеүселәргә мәктәп директоры Зөбәржәт Салауат ҡыҙы Моратова Маҡтау ҡағыҙы, тәмлекәстәр әҙерләгәйне.
Байрамдан һуң барыһы ла бик шат һәм ҡәнәғәт ине.
Фәйрүзә АЗАМАТОВА,
башланғыс синыфтар уҡытыусыһы.
Баймаҡ районы,
Аҡморон мәктәбе.