Саңғысылар тағы ла ҡыуандырҙы. Тәүҙә Юлия Ступак, Наталья Непряева, Татьяна Сорина һәм Вероника Степанова эстафета ярышында алтын миҙал эйәһе булды. Уларҙан ир-егеттәр ҙә ҡалышманы. Алексей Червоткин, Александр Большунов, Денис Спицов һәм Сергей Устюгов та иң-иңе булып танылды.
Шорт-тректа 500 метр арауыҡҡа ярышта Константин Ивлиев көмөш миҙал алһа, ә конькиҙа шул уҡ араға уҙышта Ангелина Голикова өсөнсө урын яуланы.
Саңғысы Александр Большунов та Ҡышҡы Олимпиадаға ныҡлы әҙерләнгән, күрәһең. Был юлы алтын булмаһа ла, көмөш миҙалға лайыҡ булды. Норвегиянан Йоханнес Клебонан ғына ҡалышты ул 15 километр араға уҙышта.
Фигуралы шыуыу буйынса боҙҙа бейеүҙә Виктория Синицына менән Никита Кацалапов икенсе урын алды. Беренсе урында – Франциянан Габриэла Пападакис менән Гийом Сизерон.
Коньки уҙышында Даниил Алдошкин, Сергей Трофимов һәм Руслан Захаровтар (беҙҙең яҡташ) көмөш миҙал яуланы. Улар өсәүләп команда ярышында американдарҙы артта ҡалдырһалар ҙа, Норвегия спортсыларын уҙа алманы.
Саңғысылар миҙал артынан миҙал яулай ғына! Команда спринтында финалда Юлия Ступак менән Наталья Непряева һәм Александр Большунов менән Александр Терентьев өсөнсө урын алды.
Биатлонда беҙҙең ҡатын-ҡыҙҙар командаһы ла уңышҡа иреште. Ирина Казакевич, Кристина Резцова, Светлана Миронова, Ульяна Ниғмәтуллиналар көмөш миҙал менән бүләкләнде.
Илья Буров (фристайл, акробатика) тағы бер бронза миҙал яуланы.