Һаулығы яғынан мөмкинлеге сикләнһә лә, белеме, рухи үҫешкә ынтылышы, тырышлығы менән ул күптәргә өлгө булырлыҡ. Китап, гәзит-журналдар – уның иң яҡын дуҫтары.
Арыҫлан әҙәбиәт менән етди мауыға. Бигерәк тә ул тарихи китаптарға өҫтөнлөк бирә. Рәсәй, Башҡортостан, район тарихына арналған йыйынтыҡтарҙы ҡарап бара. Һуңғы осорҙа Рәсәй полководецтары менән ҡыҙыҡһына башлаған, һәр береһенең биографияһын яттан белә. Шуныһы ла иғтибарға лайыҡ: ул үҙе уҡыған һәр мәғлүмәтте ике телдә – башҡортса һәм урыҫса ла берҙәй матур итеп һөйләп бирә.
Арыҫлан – китапханабыҙҙа көтөп алынған ҡунаҡ. Китап уҡыуҙан тыш, беҙҙә уҙғарылған конкурстарҙа ла әүҙем ҡатнаша. Әсәһе Римма менән бик тырышып әҙерләнә улар. Бына күптән түгел генә мәҙәниәт министрлығы ойошторған «Ҡыҙҙар һәм малайҙарҙың яратҡан китаптары» республика ижади бәйгеһендә көсөн һынап, яҡташыбыҙ еңеүселәр исемлегендә лайыҡлы урын алды.
Беҙ Арыҫланға яңынан-яңы уңыштар, тормош ауырлыҡтарына бирешмәй, бейек-бейек үрҙәр яулауын теләйбеҙ.
Сәлимә БАЙГИЛДИНА.
Хәйбулла районы.