-8 °С
Болотло
TelegramТестарVKOK
Бөтә яңылыҡтар

Башҡорт милли аштарын да оҫта бешерә

Беҙҙең Исмаил ауылында аш-һыу оҫтаһы – 65 йәшлек Фәһүә апай Ғибәҙуллина йәшәй. Тормош иптәше Рәзим ағай менән өс балаға ғүмер бүләк иткән кешеләр улар.



Хаҡлы ялға сыҡҡансы Фәһүә апай дауаханала ашнаҡсы булып эшләй, башҡорт, татар милли аштарын да оҫта итеп бешерә. Барыһы ла яратҡан байрам ризығы – сәксәкте лә теләгән һәр кемгә әҙерләп бирә ул.

Фәһүә апай беҙгә ҙур табын өсөн сәксәк бешереү серҙәре менән дә бүлеште. Бының өсөн 20 йоморт­ҡаны һытып, 2 килограмм юғары сорт онға, бер семтем аш содаһы ҡушып, йомшаҡ ҡына итеп ҡамыр баҫабыҙ ҙа йәйеп, таҫмаларға ки­ҫеп, өҫтөн ябып, ҡабартып алабыҙ. Һу­ңынан ваҡлап ҡыр­ҡып, һауытта­ғы ҡайнап тор­ған 3 литр көнбағыш майында бол­ғата-бол­ғата бешерәбеҙ.

Әҙер булғас, бауырһаҡты ҡатырабыҙ. Бының өсөн 6 көрөшкә шәкәргә 1 көрөшкә һыу һалып, ут өҫтөндә масса һуҙыла башлағансы ҡайнатабыҙ. Унан бында ярты стакан бал өҫтәйбеҙ. Табаҡҡа сәксәкте һалып, ошо масса менән болғатабыҙ. Аҙаҡтан батмусҡа тау кеүек өйәһең. Матур булһын өсөн өҫтөнә сәскә эшләп ҡуйырға ла мөмкин. Кондитер биҙәүестәр ҙә һибеп ҡуйырға була.


Айгөл ҒӘЛИЕВА, туған телдәр уҡытыусыһы.
Дүртөйлө районы.

Читайте нас в