– Алтынсыла уҡығанда ауыл мәҙәниәт йортонда эшләп килгән «Оҫта ҡулдар» түңәрәгендә тәүге тапҡыр сәйлән менән күсмә-күс (ҡамҡа) эшләп ҡарағайным. Оҡшап ҡалды. Шунан беләҙек, алҡа кеүек биҙәүестәр, сувенирҙар, картиналар яһауға күстем. Хәҙер күберәк интернеттан ҡарап өйрәнәм. Буш ваҡытым килеп сығыу менән яратҡан шөғөлөмә тотонам. Эштәремде байрамдарҙа яҡындарыма, әхирәттәремә бүләк тә итәм. Ҡыуанып ҡабул итәләр, – ти Әлфинур үҙе был хаҡта.
Өләсәһе Зәлиә Сәмиғуллинанан халҡыбыҙҙың милли кәсептәренең береһе булған балаҫ һуғыу серҙәренә лә өйрәнә оҫта ҡуллы ҡыҙ. Был шөғөлө айырыуса һоҡландырҙы. Балаҫ һуғыу – хәҙерге заманда онотолоп барған һөнәр бит, оҫталар ҙа әллә ни күп түгел. Шуға ла өләсәйҙәребеҙҙән ҡалған һуғылған балаҫтар беҙҙең өсөн ҡомартҡыға тиң. Ә уҡыусы баланың был шөғөл менән мауығыуы күптәргә өлгө булырлыҡ.
– Өләсәйем тирә-яҡта балаҫ һуғыу оҫтаһы булып танылған. Уның һуҡҡан балаҫтарының иҫәбе-һаны юҡ. Һәр береһе матур, сағыу, үҙенсәлекле биҙәктәр менән эшләнгән. Үҙемде белгәндән алып өй эсендә станок булды. Өләсәйем уны күҙ ҡараһылай ҡәҙерләп һаҡлай. Тәүҙә уның күңел биреп, онотолоп балаҫ һуғыуын ҡыҙығып ҡарай торғайным. Үҫә төшкәс, мине лә өйрәтә башланы. Хәҙер станок менән эш итә беләм. Икәүләшеп балаҫтар һуғабыҙ. Был шөғөл күңелемә бик яҡын, аҙаҡ һөҙөмтәһен күреү – икеләтә ҡыуаныслы. Был ҡәнәғәтлек тойғоһо бирә, күңелдәргә ҡанат ҡуя, – тип тәьҫораттары менән уртаҡлашты Әлфинур.
Өләсәһе генә түгел, әсәһе лә оҫта ҡуллы уның. Сигеү, бәйләүгә һәләте унан күскән.
Тырыш ҡыҙ уҡыуҙа ла һынатмай. Яҡшы билдәләргә генә өлгәшә. Башҡорт теле, урыҫ теле, әҙәбиәт, йәмғиәтте өйрәнеү дәрестәрен көтөп ала. Төрлө олимпиада, ижади бәйгеләрҙә ҡатнашып, бихисап Маҡтау ҡағыҙҙары, дипломдар менән бүләкләнгән. Рәсемде лә оҫта төшөрә, бейеү, театр түңәрәктәрендә шөғөлләнә. Ҡыҫҡаһы, өлгөр ҡыҙ лицей тормошонда ҡайнап йәшәй.
Ваҡыттың һәр минутын файҙалы үткәрергә тырыша. Быйыл IX синыфта булғас, буш ваҡыт һирәк эләкһә лә, ҡул эштәре менән булышырға яйын таба ул.
Күңел талабына әйләнгән матур шөғөлдәреңдән киләсәктә лә айырылма, Әлфинур! Һинең һымаҡ күңеле матур, ҡулдары алтын булған матурлыҡ тыуҙырырға яратыусы кешеләр биҙәй бит донъяны!
Юлиә КИРӘЕВА.