Өлкән бала булараҡ, ата-әсәһенең алыштырғыһыҙ ярҙамсыһы ул. Мал-тыуар ҡараша, ҡош-ҡорт ашата, баҡсаға һыу һибә, бәпкәләрҙе ҡарғаларҙан һаҡлай. Ул ғына ла түгел, ҡуяндар ҙа ҡарай Фәнзил. Егерменән артыҡ йомшаҡҡайҙары бар. Уларға ашарға һалып, урындарын таҙартып тора, һәр береһенә иғтибарлы.
– Ауылыбыҙҙа йәшәгән Вәсим бабайым ҡуяндар үрсетә. Уларға барған һайын ҡыҙығып ҡарай торғайным. Минең дә ҡуяндарым булһа ине, тип хыялландым. Был хаҡта атайым менән әсәйемә лә әйтеп ҡарағайным, уйларбыҙ, тинеләр. Ә тыуған көнөмдә көтмәгәндә Вәсим бабайым, ҡустым менән икебеҙгә тип, ике ҡуян бүләк итте. Ныҡ ҡыуандым! – тип нисек ҡуянлы булып китеүен һөйләне ул.
Бүләк ителгән ҡуяндарға атаһы, ҡустыһы менән бергә ситлек эшләп ҡуялар. Яңы урынға тиҙ генә өйрәнеп, яңы хужаларына еңел генә эйәләшеп китә шешҡолаҡтар. Изге күңелле, хәстәрлекле, уңған малай уларҙы ҡарау мәшәҡәттәренән һис ялыҡмай, киреһенсә, эшен яратып, ҡыуанып башҡара. Ҡустыһы Илназ да уға булыша.
– Үҙҙәрен кәбеҫтә, кишер, үлән, бесән, бойҙай менән һыйлайбыҙ. Һыуҙары бөтмәгәнме икәнен тикшереп кенә торабыҙ. Ауыҙҙарын ослайтып, тиҙ-тиҙ генә ашайҙар. Уларҙы күҙәтеүе шул тиклем ҡыҙыҡ. Ә иң ҡыуаныслыһы – бәләкәй шешҡолаҡтарым барлыҡҡа килде. Яңы тыуған ҡуян балаларын тоторға ярамай икәнен яҡшы беләм хәҙер. Көслө тауыштарҙан да ныҡ ҡурҡалар, – тип белгәндәре менән уртаҡлашты Фәнзил.
Ҡуяндарын бик ярата ул, улар хаҡында сәғәттәр буйы һөйләргә әҙер. Интернеттан да мәғлүмәттәр уҡый, нисек дөрөҫ тәрбиәләргә өйрәнә.
Ҡыҙыҡһыныусан, изге йәнле, уңған булып үҫеп килгән Фәнзилдең ҡуяндар аҫрауы – үҙенә күрә бер матур шөғөл, кәсеп бит. Бәләкәйҙән ваҡытты дөрөҫ бүлергә өйрәтеп, яуаплылыҡ, сабырлыҡ сифаттары ла тәрбиәләй ул бала күңелендә. Бәлки, һеҙҙең арала ла Фәнзил кеүек шәп егеттәр барҙыр? Улар хаҡында беҙгә лә яҙып ебәрегеҙ, дуҫтар!