Рәйлә Кәшфулла ҡыҙы Латипова – Ғафури районының Юлыҡ ауылынан. БДПУ-ны тамамлағас, Ҡыйғы районында, Ишембай ҡалаһында урыҫ һәм башҡорт телдәренән уҡыта. Салауат ҡалаһына күсеп килгәс, балалар баҡсаһында тәрбиәсе булып эшләй. Ҡайҙа эшләһә лә, йәш быуынды милли асылыбыҙ нескәлектәренә төшөндөрә, телебеҙгә, тарихыбыҙға һөйөү, ихтирам тәрбиәләй.
Бынан бер нисә йыл элек милли биҙәүестәргә ҡыҙыҡһыныу, ихтыяж артҡанын күреп, Рәйлә Кәшфулла ҡыҙының да был эш менән шөғөлләнергә теләге барлыҡҡа килә. Буй етмәһә – уй етә, ә уй етһә – буй етә, тиҙәр бит. Ул махсус магазиндарҙа була, эҙләнә, өйрәнә. Өләсәһенең яңы шөғөлөн күреп, ейәнсәре Илвина ла ҡыҙыҡһына башлай. Түшелдерек, ҡашмау, муйынсаҡ, алҡа кеүек беҙҙең халыҡта киң таралған биҙәүестәрҙе икәүләшеп эшләргә тотоналар. Был ваҡытта утыҙ йыл балаларға белем биргән мөғәллимә ейәнсәренә әкиәттәр, төрлө фәһемле ваҡиғаларҙы һөйләүҙе, мәҡәл һәм әйтемдәрҙең мәғәнәһен төшөндөрөүҙе лә маҡсат итеп ҡуйған.
Илвина Ишбирҙина – Ишембай ҡалаһының 1-се гимназияһында II синыфта белем ала. Гимнастика менән шөғөлләнә, һүрәт төшөрөргә, бейергә ярата. Өйҙә ата-әсәһенә ҙур ярҙамсы. Әйткәндәй, әсәһе Лилиә Илгиз ҡыҙы ла ҡул эштәре менән булышырға әүәҫ икән. Ырғаҡ менән урындыҡҡа, ултырғысҡа, иҙәнгә япмалар бәйләй.
Атанан күргән – уҡ юнған, әсәнән күргән – тун бескән, тиҙәр бит. Быны беҙ Рәйлә Кәшфулла ҡыҙы өлгөһөндә күрәбеҙ. «Илвинаның милли биҙәүестәргә булған ҡыҙыҡһыныуы мине дәртләндерә, арабыҙҙағы өләсәй-ейәнсәр мөнәсәбәтенә йылылыҡ өҫтәй. Ә инде уның: «Мин үҙемдең милли биҙәүестәремде балаларыма бүләк итәсәкмен, был шөғөлдө уларға ла өйрәтәсәкмен», – тиеүе быуындар сылбырының өҙөлмәйәсәгенә, милләтебеҙҙең үҙ моңо, үҙ йәшәйеше һаҡланасағына ишара», – ти ул шатланып.
Рәзинә ЗӘЙНЕТДИНОВА.