Уҡытыусылары Гөлфиә Вәлитова етәкселегендә кейеҙҙән әҙерләгән «Дала көйө» коллекцияһын күрһәткәйнеләр. Шул оҫта ҡуллы ҡыҙҙарҙың береһе – 2-се мәктәптең VII «Г» синыфында белем алған Гөлнур Юлдашбаева сәнғәт мәктәбендә рәсем буйынса IV синыфта уҡый.
– Бейеүгә бирергә уйлағайным, миңә һүрәт төшөрөү, ҡул эштәре оҡшай, тигәс, ҡаршы булманыҡ, – ти әсәһе. Бик дөрөҫ, бала һәләтенә, теләгенә ҡарап түңәрәк, секцияны үҙе һайларға тейеш. Яратҡан эш менән шөғөлләнеү күңелгә ял ғына бит. Дизайнер булырға теләгән ҡыҙ бөгөндән киләсәгенә юл яра. Уңыштар ғына юлдаш булһын.
Гөлнур яҡшы уҡый. Бигерәк тә математика һәм әҙәбиәт дәрестәрен ярата. Өҫтәмә белем алыу еңелдән булмаһа ла, төштән һуң «Моделләү һәм кейем дизайны» буйынса ла ҙур теләк менән шөғөлләнә. Ҡыҙ төрлө ысулдар менән һүрәттәр төшөрә. Матур ғына килеп сыға. Кейеҙҙән төрлө картиналар, уйынсыҡтар яһай. Конкурстарҙа ҡатнашып, алдынғы урындар яулай. Яҡшы уҡыуы, еңеүҙәре өсөн район хакимиәте башлығының махсус бүләгенә лә лайыҡ булған. Былтыр «Алтын сапсан» ХI Бөтә Рәсәй балалар һәм үҫмерҙәр фестивалендә III урын яулаған.
Гөлнур таҫма менән сигеп тә картиналар эшләй. Быйыл сәнғәт мәктәбенең сығарылыш синыфында уҡый ул. Шуға әле диплом эше менән мәшғүл: таҫма менән сигеп картина эшләй һәм туҡымаға һүрәт төшөрәсәк.
Әсәнән күргән – тун бескән, тигән кеүек, Гөлнур бәләкәйҙән әсәһенән күреп, төрлө әйберҙәр бәйләргә тырыша. Шулай итеп, ҡул эше менән мауығып китә. Каникулдарын Зөлфиә һеңлеһе менән Ибрайҙа үткәрергә яраталар. Гөлнур өләсәһенән дә ойоҡ-бейәләй, ултырғыстарға япма бәйләргә өйрәнгән.
Ял ваҡытында һылыуы менән интернеттан ҡарап төрлө-төрлө торттар, печеньелар ҙа бешерәләр. Бассейнға, катокка йөрөйҙәр. Вилнур ҡустыларын ҡарарға ярҙам итәләр.
Өлгөр ҡыҙ баскетбол секцияһында шөғөлләнергә лә ваҡыт таба. Яҙғы каникулда маникюр эшләү серҙәрен дә өйрәнергә уйлай.
– Буш ваҡыттығыҙҙы әрәмгә үткәрмәгеҙ. Яратҡан шөғөлөгөҙ менән булышығыҙ, – тигән теләген дә еткерҙе Гөлнур тиҫтерҙәренә.
Эльвира ӘСӘҘУЛЛИНА.
Ейәнсура районы.