Бал татлы булһа ла, хеҙмәте әсе

Дилә быйыл IV синыфҡа бара, Билал – һигеҙенсегә. Улар Өфө ҡалаһының 93-сө физика-математика лицейында уҡый. Йәйге каникулдарын әсәләре Әнисә Хәсән ҡыҙының тыуған яғында – Белорет районының Берештамаҡ ауылында үткәрергә яраталар. Инйәрҙә һыу инәләр, баҡса үҫтерешәләр һәм, әлбиттә, бал ҡорттарын ҡарашалар.
– Ҡорттан сағылып, ҡайһы бер­ҙә мәктәпкә шешкән күҙ йә танау менән барырға тура килә. Синыф­таштарым да быға өйрәнеп бөттө, шаяртып, миңә «пчеловод» ти­гән ҡушамат таҡтылар, – тип көлә Билал.
Билал – умарталыҡта төп яр­ҙамсы. Атаһы бал алған саҡта тиҙ генә дәдәндең (беҙҙә умартаны шулай тиҙәр) ҡапҡасын асып-ябып тора, рамдарҙы таҙарта, бал айыртыша. Диләнең дә эше яуаплы – ул ата-әсәһенә күс айыр­ғанын хәбәр итә һәм умартаны төтәҫләй.
– Кәрәҙле рамдарҙы алған саҡта ҡорттар саҡмаһын өсөн төтөн ебәрергә кәрәк. Уның менән бал ҡорттарын ҡайһы бер сирҙәрҙән дауаларға ла була,– тип аңлата Дилә.
Күс айырғанын күреп, хәбәр итер өсөн Диләгә умарталыҡтан күҙ ҙә алмаҫҡа тура килә. Әгәр күрмәй ҡалһа, айырылып сыҡҡан күс ситкә осоп китә, тимәк, бал да әҙерәк буласаҡ.
– Ҡорттар аяҙ, эҫе һәм ел булмаған саҡта айыра. Ғәҙәттә, иртәнге 11-ҙән киске 5-кә тиклем. Был йәйҙә мин биш тапҡыр ваҡытында күреп ҡалып, өлкәндәргә әйттем. Улар күстәрҙе алып ҡалды,– ти ҡыйыу ҡыҙ.
Томаншиндарҙың ун баш умартаһы бар. Былтыр 100 литр бал алғандар. Үҙҙәренән һәм туғандарынан артып ҡалғанды һатып, Дилә менән Билалға мәктәп кейеме һәм кәрәк-ярағына тотоналар.

Нурзиә ХӘСӘНОВА.