Сумкалары күҙ яуын ала

Оҫталар Гөлнара Саттарова менән уның хәләл ефете Алексей Максимов булып сыҡты. Инде бер йыл самаһы матур-матур сумкалар яһайҙар.

– Ҡул эше менән булышырға бәләкәйҙән яратам. Үҙ эшебеҙҙе асыу хыялы күптән бар ине. Әлегә әллә ни үҫешмәгәнбеҙ, быны ҙур булмаған табыш килтереүсе шөғөл тип ҡарарға була, – ти Гөлнара ханым.

Сумкалар күберәк төрлө йәрминкәләрҙә үтә. “Бәйләнештә” селтәрендә төркөм булдырғандар, шуның аша заказ биреүселәр бар. Хаҡтар менән ҡыҙыҡһынам.

– Мәрйендәр теҙеү еңел эш тип ҡарарға ярамай. Бер сумка 2500 – 3000 һум тора. Әлбиттә, балаларҙыҡы осһоҙораҡ – 500 һумдан 1000 һумға тиклем һатабыҙ, – ти йүнселдәр.

Эстән яҡшылап көпләп тегелгән затлы сумканы ялға ла, эшкә лә йөрөтөргә була. Бүләк итер өсөн алыусылар күп. Сөнки был әйберҙе төрлө стилдә яһап була. Күҙ теймәһен оҫталарҙың ҡулына!

АВТОР фотолары.