Төҫлө ҡатырға битен дүрткә бөкләп, буласаҡ ваҡыт иҫәпләгестең алдын, артын, төбөн билдәләйбеҙ. Хәҙер алғы өлөштө биҙәргә кәрәк. Әгәр йәнһүрәт геройы, йыл хужаһы йә башҡа хайуанды төшөрәһегеҙ икән, ҡуйыласаҡ кеҫәләр уларҙың йөҙөн ҡапламаҫлыҡ булһын. Һүрәттәге календарҙа өс кеҫә өсөн өс һүрәт бирелгән. Матур, сағыу итеп үҙеңә эшләргә йә әҙер һүрәтте ҡырҡып алырға була. Махсус йәбештергестәр ҙә бара. Ғаилә фотоһын ҡуйһағыҙ, тағы ла йәмлерәк. Календарға ялтыр-йолторҙар беркетһәгеҙ, көн һайын байрамса кәйеф биреп торор үҙегеҙгә.
Ҙур булмаған кеҫәләр йәбештергәс, аҙна көндәрен, даталарҙы, ай атамаларын айырым ҡағыҙҙарға яҙырға кәрәк. Төрлө төҫтә булһа, тағы ла күңеллерәк. Ай исемдәрен ошолай ҙа эшләргә була: көҙгөләре – һары, йәйгеләре – йәшел... Был карточкаларҙы теләгән формала ҡырҡа алаһығыҙ.