Бар яҡтан да өлгөлө

Ул Туймазы районы Иҫке Туймазы белем биреү үҙәгенең III синыфын тик «дүртле» һәм «бишле» билдәләренә генә тамамлаған. Уҡытыусыһы Лира Хәләф ҡыҙы Ғиниәтуллина үҙен маҡтап:
— Далиәр дәрестә тиҙ генә яңы теманы үҙләштерә, таҡтаға сығып, матур итеп яҙырға ла өлгөрә, өйгә эштәрен дә теүәл башҡара. Бар яҡтан да өлгөлө бит ул, — ти.
Был малай әсәһенең аш-һыу бүлмәһендә лә гел ярҙам итә. «Эшләп ашаһаң, бик тәмле була», – ти әле үҙе. Әле үк төрлө бәлеш, ҡоймаҡ, майикмәк бешерергә, эремсек яһарға өйрәнгән.
Ғаиләлә 3 бала тәрбиәләнә. Дилара, Камил һәм иң кеселәре – Далиәр.
Ҡурамшиндар күпләп мал-тыуар аҫрағас, барыһы ла бала саҡтан эшкә өйрәнеп үҫә. Ҡышҡылыҡҡа мал-тыуар кәртә-ҡураға ингәс, йылҡы малына, пониға, һыйыр, быҙауҙарға кем бесән һала, тип уйлайһығыҙ? Әлбиттә, Далиәр! Ул бар ергә лә өлгөрә бит. Синыфташы, дуҫы Искәндәр Бәҙретдинов уның хаҡында:
– Дуҫым менән ғорурланам, белмәгән нәмәһе юҡ. Аш-һыуға ла оҫта үҙе. Тырыш, уңған дуҫымды синыфта барыбыҙ ҙа яратабыҙ, — ти.
Бына шундай шәп малай үҫә Туймазы районында. Дуҫтар, ә һеҙҙең яҡта бармы ошондайҙар? Булһа, беҙгә лә яҙып ебәрегеҙ тиҫтерҙәрегеҙ хаҡында.