Үҙ ҡулдары менән мөғжизә булдыралар

Салауат районы Янғантау мәктәбенең IV «Б» синыфы уҡыусылары дәрестәрҙә ата-бабалар тарихын өйрәнеп кенә ҡалмай, үҙ ҡулдары менән ҡыҙҙар өсөн стилләштерелгән башҡорт биҙәүестәрен эшләргә тотонған.
– Бүлмәлә эш ҡайнай! Уҡыусыларымдың күҙҙәре яна, ә бармаҡтары үҙенән-үҙе тәңкәне тырышып тегә. Әлбиттә, матур килеп сыҡһын өсөн ҡыҙҙар эшкә етди тотона. Ә малайҙарыбыҙ һуң! Улар инде ысын ир-ат оҫталығын күрһәтте лә ҡуйҙы! Дизайнға үҙ идеяларын индереп кенә ҡалманы, тағы икенсе башҡарыу юлдарын эҙләп, гөж килде. Ҡарап тороуы үҙе бер кинәнес ине! Матурлыҡты булдырыу – тик ҡатын-ҡыҙ эше генә, тип кем әйтте икән? Беҙҙең малайҙар киреһен иҫбатланы. Эйе, боронғо һөнәрҙең бөтә нес­кәлектәрен үҙләштереү еңел түгел, әммә балаларҙың һәләтенә көнләшергә генә ҡала, — ти уҡытыусылары Земфира Кәримова.
Биҙәүестәре матур ғына күренә. Әлбиттә, ижад емештәре камил уҡ булмаһа ла, улар үҙ халҡының мәҙәниәтенә ихтирамын күр­һәтеп, эштәрен күңел һалып башҡарғандары маҡтауға лайыҡ. Бәлки, кемдер өсөн был халыҡ ижады менән мауығыу – тәүге аҙым ғыналыр. Иң мөһиме – яратып баш­ҡарылды бит. Уҡыусылар үҙ ҡулдары менән менән әҙерләгән биҙәүестәрен әсәйҙәренә бүләк иткән.
Бына шулай йолаларҙы хөрмәт итеп, үҙ ҡулдары менән мөғжизә булдырырға тырышҡан алмаш үҫеп килә Янғантау мәктәбендә.