Асия ла бәлеш бешерә

Бар яҡтан да өлгөлө ҡыҙ буш ваҡыты булыу менән әсәһенә тәм-том әҙерләшергә ярҙам итә. Сөнки ауылдаштары Асияның әсәһе Инира ханымдың тәмле итеп бешергән ризыҡтарына заказ биреп кенә тора. Оҫта бешереүсенең даны әллә ҡасан таралған инде. Дөрөҫөн әйткәндә, аят саралары, туй, килен төшөрөү, кейәү сәйе табындары Инира ханымдың бешергән төрлө тәмлекәстәре, бәлештәре, торттарһыҙ үтмәй. Шуға Асия ла әсәһенә гел ярҙам итеп, күптән оҫтарып алған. Яңыраҡ был уңған ҡыҙ май бешергә өйрәнгән. Үҙенең белмәгән нәмәһе юҡ бит әле. Һораһаң, һәр ризыҡ хаҡында матур итеп һөйләп бирә.

– Борондан ата-бабаларыбыҙ һыйыр һөтөнән төрлө ризыҡ әҙерләргә оҫта булған. Ҡаймаҡ, ҡорот, ҡатыҡ, эремсек, аҡ май яһағандар. Яҙ айҙарында малдар йәшел үлән ашай башлағас та, һөт һары төҫкә инә. Ундай һөттән айыртылған ҡаймаҡ та һарғылт була. Шуға ҡаймаҡтан яҙылған май ҙа һарғылт төҫтә килеп сыға бит. Аҡ майҙы ҡамыр ризыҡтарын бешергәндә ҡулланабыҙ. Әлбиттә, ҡышҡылыҡҡа ла йыябыҙ, – ти Асия. – Тәбиғи ысул менән әҙерләнгән май тәмле лә, шифалы ла була. Әле йәй әсәйем миңә лә ҡаймаҡтан май бешеү серҙәрен өйрәтте. Эшкә тотоноп ҡараным. Беренсе тапҡыр ғына бешһәм дә, май еңел яҙылды, айраны тиҙ сыҡты. Эшемдең һөҙөмтәһен күреп, ныҡ шатландым.

Яҙғыһын Асия уҡыған гимназияға осрашыуға барғайныҡ. Унда оҫта ҡыҙ бәлеш бешереп алып килгәйне. Ныҡ тәмле булды! Бөгөн уның рецебын һеҙгә лә тәҡдим итә. Өс ҡатлы ул.
Ҡамыр өсөн 150 миллиграмм һөт, 4 аш ҡалағы шәкәр ҡомо, 1 йомортҡа, бер семтем тоҙ, 180 грамм аҡ май (маргарин), 5 грамм ҡоро әсетке һәм самалап он кәрәк буласаҡ.

Эслек өсөн: ҡара емеш, өрөк (күрәгә), 2 лимон, 2 ҡалаҡ крахмал оно, 4 аш ҡалағы шәкәр ҡомо.
Эш барышы:
1. Эслек өсөн ҡара емеш, өрөк һәм лимонды айырым ит үткәргес аша әҙерләп алабыҙ.
2. Ҡара емеш менән өрөккә 2 балғалаҡ шәкәр ҡомо, ҡайнар һыу ҡойоп, артыҡ шыйыҡ итмәй генә бутарға.
3. Лимонға 2 ҡалаҡ крахмал оно, 4 ҡалаҡ шәкәр ҡомо ҡушабыҙ.
4. 150 миллиграмм йылы һөткә әҙ генә он, әсетке һалып, болғап ҡабартырға ҡуйырға.
5. Икенсе һауытҡа аҡ май (маргарин да мөмкин), шәкәр ҡомо, он, тоҙ һалып, ыуалып торған масса әҙерләргә.
6. Ҡабарған ҡамырға йомортҡа һәм ыуалып торған массаны ҡушып, йомшаҡ ҡамыр баҫырға.
7. Әҙер ҡамырҙы шыптыр тоҡсайға һалып, 15–20 минутҡа һыуытҡысҡа ял итергә ҡуйырға.
8. Ваҡыты тулғас, ҡамырҙы алып 4 өлөшкә бүлергә (100 грамм, 100 грамм, 120 грамм һәм 180 грамм).
9. 180 грамм ҡамырҙы йәйеп табаға һылырға, төбөн сәнске менән тишкеләргә.
10. Ҡамыр өҫтөнә ҡара емеште тигеҙләп һалырға.
11. 100 грамм ҡамырҙы йоҡа ғына итеп йәйеп, ҡара емеш өҫтөнә һалып, ситтәрен йәбештерергә һәм ҡамырҙы сәнске менән тишкеләргә.
12. Ҡамыр өҫтөнә өрөктө һалып буярға.
13. 100 грамм ҡамырҙы йоҡа ғына йәйеп, өрөк өҫтөнә һалғас, ситтәрен йәбештерергә лә ҡамырҙы сәнске менән тишкеләп сығырға.
14. Лимонды ҡамыр өҫтөнә тигеҙләп һыларға.
15. 120 грамм ҡамырҙы йоҡа ғына итеп йәйеп, лимон өҫтөнән ҡапларға. Ситтәрен йәбештерергә.
16. Бәлеште 180 градус ҡыҙыулыҡтағы мейескә ҡуйып, өҫтө ҡыҙарғансы бешерергә.

Зөһрә ХӘКИМОВА.