-11 °С
Болотло
Бөтә яңылыҡтар
Һөйөнсө
12 Апрель 2019, 15:08
«Бирешмә»: алға ынтыл!
«Бирешмә» проектының тәүге үҫмерҙәр сериалын көтөп алып, яратып ҡарағайныҡ. «Бирешмә»-профи» телевизион тапшырыуы үҫмерҙәргә һөнәр һайлағанда йүнәлеш бирә. Һәм бына тағы бер яңылыҡ: быйыл «Бирешмә» беренсе үҫмерҙәр премияһы булдырылды. «Тамыр» телеканалының етәксеһе Гөлназ Ҡолһарина әйтеүенсә, уның маҡсаты – ҡыйыулыҡ һәм әүҙем гражданлыҡ позицияһын күрһәткән, тормошта ауыр хәлдәрҙе еңеп сыҡҡан, һайлаған юлында ҙур уңыштарға өлгәшкән балаларҙы һәм үҫмерҙәрҙе хөрмәтләү, рәхмәт белдереү. Бик хуп!
«Бирешмә» беренсе үҫмерҙәр премияһына төрлө номинацияларҙа 137 ғариза ҡабул ителгән. Беҙҙең республикала һәләтле, тырыш, булдыҡлы, ҡыйыу уҡыусылар бик күп, баһалама ағзаларына иң-иңдәрҙе билдәләүе еңел булмағандыр. 7 апрелдә еңеүселәрҙе бүләкләү тантанаһы проекттың ҙур концерты барышында үтте. Премияны ведомство, министрлыҡ етәкселәре, депутат, күренекле шәхестәребеҙ тапшырҙы. Ете номинацияла – ете еңеүсе. Бына улар:
«Бирешмә: ярҙам ит!» буйынса Ишембай районы Үрге Этҡол ауылынан Ирек Үмәрбаев премияға эйә булды. Ул янғындан оло йәштәге инәйҙе ҡотҡара.
«Бирешмә: белемгә ынтыл!» (уҡыуҙа, фән буйынса яулаған уңыштар өсөн) – Йылайыр районы ҡыҙы Сафия Хажиморатова.
«Бирешмә: көслө бул!» (шәп спортсыларға) – Өфөнән Илнур Ғарипов. Ул күреү һәләтен юғалтҡас та спорттан айырылмаған, йөҙөү буйынса уңыштары һоҡландыра.
«Бирешмә: ижад ит!» (cәнғәттәге уңыштар өсөн) – Эвелина Вәхитова, Өфөләге 28-се махсус интернат-мәктәп тәрбиәләнеүсеһе, йырлай, көйҙәр ижад итә, баянда уйнай. Республика, халыҡ-ара конкурстар еңеүсеһе.
«Бирешмә: телде үҫтер!» – Учалы районының Яңы Байрамғол ауылынан башҡорт телен, «Урал батыр»ҙы ил кимәлендә яңғыратҡан Ләйсән Золотарёва.
«Бирешмә: ереңде һаҡла!» (йәш экологтарға) – Архангел районының Тирәкле ауылынан Гүзәл Шәрәфетдинова.
«Бирешмә: медиадонъяны яула!» –Бөрйән районының Байназар мәктәбенән Зилиә Буранғолова. Рәсәй, республика кимәлендәге ҙур уңыштары өсөн.
– «Тамыр» каналына, «Бирешмә» төркөмөнә, үҙемдең уҡытыусыларыма ла ҙур рәхмәтлемен. Бирешмәгеҙ, гел алға атлағыҙ! – тип өндәште байрамда ҡатнашыусы тиҫтерҙәренә Эвелина Вәхитова. Ләйсән Золотарёва «Сыңрау торна» йырын башҡарып, барыһын да һоҡландырҙы. Уны тәбрикләгәндә UX/UI-дизайнер Илдар Кинйәбулатовтың: «Бөтә башҡорт балалары ла башҡорт телендә һөйләшһә, башҡорт теле йәшәйәсәк», – тигән һүҙҙәрен балалар иғтибарһыҙ ҡалдырмаҫ, моғайын. Шулай уҡ премияның бағымсыларының береһе, йәш эшҡыуар Динар Шәһиевтең: «Теле барҙың – ере бар. Телде белһәгеҙ, ерҙе һаҡлай алырһығыҙ», – тигәне лә бик әһәмиәтле булды.
«Тамыр» телеканалы һәм «Юлдаш» радиоһынан «Теге өсәү» тапшырыуын алып барыусыларҙың береһе, баһалама комиссияһы ағзаһы Ғәзиз Әбделмәнов махсус бүләктәрен тапшырҙы. Уларға Өфөнән «Бирешмә» сериалында ҡатнашҡан, йырҙары менән һеҙгә таныш Айгөл Ибраһимова һәм Стәрлебаш районынан спортсы Рафиҡ Шароян лайыҡ булды.
«Бирешмә» төркөмө йырсыларының концертын да уларҙы кумирҙары итеп өлгөргән тамашасылар яратып ҡараны. Сараға республиканың төрлө тарафтарынан уҡыусылар килгәйне. Данир, Хәйҙәр, Гәлсәр, Гөлгенәгә, «Бирешмә» проектын тормошҡа ашырыусыларға: «Афарин!» – тибеҙ. Ә беренсе үҫмерҙәр премияһы алдағы йылдарҙа тағы ла киңерәк ҡолас алыр һәм уҡыусыларҙа яңынан-яңы үрҙәргә ынтылышты арттырыр.
Читайте нас:
Редакция һайлауы
Новости партнеров
Гәзитебеҙ - дуҫыбыҙ
Фильмдар
Күңелдәрҙең иләҫ-миләҫ сағы
© 1930 йылдың 12 февраленән нәшер ителә. Ойоштороусылары: Башҡортостан Республикаһының Матбуғат һәм киң мәғлүмәт саралары агентлығы, Башҡортостан Республикаһының «Башҡортостан Республикаһы» нәшриәт йорто дәүләт унитар предприятиеһы. Баш мөхәррире — Мирсәйет Ғүмәр улы Юнысов.
Башҡортостан Республикаһы буйынса элемтә, мәғлүмәт технологиялары һәм киңкүләм коммуникациялар өлкәһендә күҙәтеү буйынса федераль хеҙмәт идаралығында 2015 йылдың 18 авгусында теркәлде. Теркәү номеры — ПИ №ТУ02-01403.
Республиканский информационный центр – филиал государственного унитарного предприятия Республики Башкортостан Издательский дом «Республика Башкортостан».
Р./счёт 40602810200000000009 в Филиал ПАО «БАНК УРАЛСИБ» в г. Уфа, БИК 048073770, ИНН 0278066967, КПП 027843012, к/с 30101810600000000770.
Телефон
+7 347 273-36-64, +7 999 133-44-62.
Электрон почта
Адресы
450079, г. Уфа, ул. 50-летия Октября, 13, 8-й этаж