+12 °С
Ямғыр
Бөтә яңылыҡтар
Ғаилә усағы
15 Ноябрь 2019, 15:33
Бәхет асылы – ғаиләлә
Ғаилә – ҙур тормоштоң бәләкәй генә бер дәүләте. Ул булмаһа, тормошҡа йәм дә, ҡот та, ырыҫ та ҡунмай. Ошо мөхиттә үҫкән бала бәләкәйҙән үк телен, үҙ милләтенең ғөрөф-ғәҙәтен, йолаһын белеп үҫергә өйрәнә. Ысынлап та, ғаилә – йәшәү усағы, кешене шәхес итеп үҫтереүсе, тәрбиәләүсе ҙур тормош мәктәбе. Шулай уҡ ышаныслы терәк, йән тыныслығы табыр, көс туплар урын.
Атайымдың исеме – Юлай. Ул алыҫ Себер тарафтарында «Роснефть» компанияһында иретеп йәбештереүсе булып эшләй. Йәйгеһен ҡортсолоҡ менән дә шөғөлләнә. Атайымдың тырышлығына, кешеләргә ярҙамсыл булыуына һоҡланам. Эштән ҡайтҡанын гел һағынып көтөп алабыҙ. Ял көндәрендә футбол, волейбол уйнарға, тәбиғәткә сығырға, балыҡ тоторға яратабыҙ.
Әсәйемдең исеме Роза булғанғамы, үҙе лә сәскә кеүек матур һәм алсаҡ йөҙлө. Ул беҙҙе – атайымды ла, ике ағайымды ла, мине лә берҙәй ярата. Бешергән аш-һыуҙары телде йоторлоҡ! Ә йәй көндәре гөрләп үҫкән сәскәләренә күҙҙәр ҡамаша. Беҙҙе һәр ваҡыт иркәләп, кәрәкле кәңәштәрен биреп, дөрөҫ итеп йәшәргә өйрәтә.
Шундай атай-әсәйем булғанына ҡыуанып бөтә алмайым. Аллам һаҡлаһын, уларһыҙ тормошомдо күҙ алдына килтереүе ҡурҡыныс...
Өләсәйемдәрҙе лә онотмайбыҙ. Улар янына барып, хәлдәрен белешеп торабыҙ. Бәләкәй саҡтан уҡ китапҡа һөйөү тәрбиәләнеләр, төрлө ҡул эштәренә – бәйләргә һәм сигергә өйрәттеләр. Рәхмәтлемен, оҙаҡ йәшәһендәр инде!
Минең яратҡан ағайымдар икеһе лә Красноусол башҡорт интернат-гимназияһында уҡыны. Өлкән ағайым – Салауат Өфө дәүләт нефть техник университетын тамамлап, әрмелә хеҙмәт итеп ҡайтты. Әлеге ваҡытта «Роснефть» компанияһында инженер булып эшләй. Азат ағайым шул уҡ уҡыу йортон бөтөрөп, «Новатек» компанияһында һөнәре буйынса уңышлы эшләп йөрөй. Ағайҙарым – миңә ныҡлы терәк. Һәр саҡ ярҙам ҡулын һуҙырға әҙерҙәр.
Ғаиләлә үҙем иң бәләкәйе булғас, ҡурсалап ҡына торалар. Бик бәхетлемен. Ошолар хаҡында уйлағанда һәр ваҡыт бөйөк ғалим Ғайса Хөсәйеновтың һүҙҙәре иҫемә төшә: «Бәхет – байлыҡ та, ҡоро рәхәтлек тә, барына ҡәнәғәтлек тә түгел, шуларҙан юғары рух байлығы, йән рәхәте, йәшәү йәме ул». Эйе, ысынлап та, бәхет асылы ғаиләлә шул. Ғөмүмән, бәхетле тормош өлгөһөн мин үҙ атай-әсәйемдән алам. Улар ипле һүҙҙәре, изге эштәре менән һоҡландыра. Шулай ғаиләбеҙ дуҫ, татыу булғас, был беҙгә артабан тормош юлдарында ҡыйыу, ныҡлы аҙымдар менән атларға көс-ҡеүәт өҫтәй ҙә инде.
Гөлнур ИБӘТУЛЛИНА.
Ғафури районы, Нияз Мәжитов исемендәге Красноусол башҡорт интернат-гимназияһы.
Читайте нас:
Редакция һайлауы
Гәзитебеҙ - дуҫыбыҙ
Фильмдар
Күңелдәрҙең иләҫ-миләҫ сағы
© 1930 йылдың 12 февраленән нәшер ителә. Ойоштороусылары: Башҡортостан Республикаһының Матбуғат һәм киң мәғлүмәт саралары агентлығы, Башҡортостан Республикаһының «Башҡортостан Республикаһы» нәшриәт йорто дәүләт унитар предприятиеһы. Баш мөхәррире — Мирсәйет Ғүмәр улы Юнысов.
Башҡортостан Республикаһы буйынса элемтә, мәғлүмәт технологиялары һәм киңкүләм коммуникациялар өлкәһендә күҙәтеү буйынса федераль хеҙмәт идаралығында 2015 йылдың 18 авгусында теркәлде. Теркәү номеры — ПИ №ТУ02-01403.
Республиканский информационный центр – филиал государственного унитарного предприятия Республики Башкортостан Издательский дом «Республика Башкортостан».
Р./счёт 40602810200000000009 в Филиал ПАО «БАНК УРАЛСИБ» в г. Уфа, БИК 048073770, ИНН 0278066967, КПП 027843012, к/с 30101810600000000770.
Телефон
+7 347 273-36-64, +7 999 133-44-62.
Электрон почта
Адресы
450079, г. Уфа, ул. 50-летия Октября, 13, 8-й этаж