Ғаиләбеҙҙә дүрт бала: миңә – ун бер, игеҙәктәр Әмилә менән Әмиргә – өс йәш, бәләкәсебеҙ Әминәгә ете ай тулды. Дәрестән ҡайтыуыма әсәйем йылмайып ҡаршы ала, иркәләп арҡамдан һөйә, мәктәп хәлдәре, уңыштарым менән ҡыҙыҡһына. Шул саҡтарҙа донъям яҡтырып, күңелемә рәхәт булып китә. Өй эштәрен бергәләп башҡарабыҙ. Иҙәнде лә, һауыт-һабаны ла йыуырға ярҙам итәм. Икәүләшеп аш-һыу әҙерләйбеҙ. Бик тәмле бәлеш, торт бешергәнен түҙемһеҙләнеп көтөп торабыҙ.
Йәй көнө баҡсала емеш-еләк, йәшелсә үҫтерәбеҙ. Матур-матур сәскәләр күҙ яуын алып, бар тирә-яҡты биҙәй. Тиҙ генә өй эштәрен бөтөрәбеҙ ҙә бергәләп ял итәбеҙ: гәзит-журнал, әҙәби китаптар уҡыйбыҙ, төрлө хәлдәр тураһында һөйләшәбеҙ. Бигерәк тә сәйәхәт итергә яратабыҙ, райондың бөтә тәбиғи ҡомартҡылары менән танышып сыҡтыҡ. Башҡортостаныбыҙҙың һәм Рәсәйҙең төрлө иҫтәлекле урындарын да күреп ҡайттыҡ.
Әсәйем өйөбөҙҙөң йәме ул. Сәләмәт, оҙон ғүмерле, бәхетле булһын инде үҙе. Мин уны гел ҡыуандырып ҡына торормон. Ер йөҙөндә бөтә балалар ҙа әсәйле, донъялар имен булһын, һуғыш уты сыҡмаһын, тип теләйем.
Эльмир ХӘМЗИН,
V «Б» синыфы уҡыусыһы.
Салауат районы,
Янғантау мәктәбе.