Беҙҙең династияның тәүге уҡытыусыһы – олатайымдың атаһы Әхтәм Низаметдин улы Низамов. Ул үҙенең уҡытыу эшмәкәрлеген 1932 йылда Әлшәй районы Ҡыпсаҡ-Асҡар ауылында башлаған. Унда мәктәп булмағас, балаларҙы бер өйгә йыйып, уҡырға һәм яҙырға өйрәткән. Ғәҙел һәм тура һүҙле уҡытыусыны уҡыусылары бик хөрмәт иткән, аҡыллы кәңәштәренә ҡолаҡ һалған. Һуҡырайыуына ҡарамаҫтан, мәғрифәтселек эшен ташламаған, тора-бара күрәҙәселек һәләте лә асылған. Улар өләсәйем менән 3 бала тәрбиәләп үҫтергән, икәүһе атаһының юлын дауам иткән.
Өлкәне Тимербай, минең бабайым, хеҙмәт юлын уҡытыусы булып тыуған ауылында бик йәшләй башлаған. Тыуыу тураһында таныҡлығы булмауҙан файҙаланып, ике йылға йәшен ҙурайтып, 1942 йылдың мартында һуғышҡа алына. Танкыға ҡаршы артиллерияла разведчик-артиллерист булып хеҙмәт итеп, Житомир, Шепетовка, Тернополь, Львов ҡалаларын азат итеп, Берлинға ингәнгә тиклем ауыр һуғыш юлдарын үтә. I Украина фронты составында Чехословакияла ла була. Күрһәткән батырлыҡтары өсөн Ҡыҙыл Йондоҙ, II дәрәжә Ватан һуғышы ордендары, ике тапҡыр «Батырлыҡ өсөн», «Берлинды алған өсөн», «Фашизмды еңгән өсөн», «Праганы азат иткән өсөн» миҙалдары менән бүләкләнә. Баш командующий тарафынан 21 рәхмәткә лайыҡ була. Еңеү көнө уңайынан бирелгән юбилей миҙалдарының иҫәбе-хисабы юҡ. Тимербай бабайым тыныс хеҙмәттә 35 йыл ғүмерен мәғарифҡа бағышлай. Бихисап Маҡтау грамоталарына, «Иң яҡшы физкультура уҡытыусыһы» тигән маҡтаулы исемгә лайыҡ булған.
Тимербай Әхтәм улы һуғыштан һуң Ҡыпсаҡ-Асҡар ауылы һылыуы Шәмсебаныуға өйләнә. Улар алты балаға ғүмер бүләк итә. Наил улдары атаһы юлынан китеп, Башҡорт дәүләт университетының география факультетын тамамлап, һөнәре буйынса эшләне.
Олатайым Ниғмәтбай Әхтәм улы Низамов – башланғыс синыфтар уҡытыусыһы. Хаҡлы ялға сыҡҡансы тыуған ауылы мәктәбендә белем бирә. Уның 17 уҡыусыһы уҡытыусы һөнәрен һайлаған.
Улар Ғәшүрә өләсәйем менән биш бала тәрбиәләп үҫтереп, барыһына ла юғары белем биргән. Шуларҙың иң өлкәне, минең атайым Хәлил Ниғмәтбай улы, 25 йыл буйына география фәненән уҡыта. Әлеге ваҡытта мәктәп директоры вазифаһын да башҡара. Әсәйем – Гөлназ Ишмырҙа ҡыҙы ла уҡытыусы. Химия, география дәрестәренән белем бирә. Ул – «Иң яҡшы уҡытыусылар» Рәсәй конкурсы еңеүсеһе, тырыш хеҙмәте өсөн Рәсәй Федерацияһы Мәғариф һәм фән министрлығының, Башҡортостан Республикаһының Почёт грамоталары менән бүләкләнгән.
Беҙ ғаиләлә 3 бала үҫтек. Айгөл һеңлем табип һөнәрен һайланы, Алмаз ҡустым – финанс университеты студенты. Мин иһә, мәктәпте алтын миҙалға тамамлап, хоҡуҡ институтында юрист һөнәрен үҙләштерҙем. Юрист белгесе булып эшләйем. Хоҡуҡ институтында студенттарға белем дә бирәм. Нәҫелебеҙҙең йылдар дауамында һуҙылып килгән уҡытыусылар сылбырын өҙмәйенсә алып барыу тап беҙҙән тора бит. Шуға ла үҙемдең киләсәгемде уҡытыусылыҡ эше менән бәйләнем.
Уҡытыусы, минеңсә, иң мәрхәмәтле һөнәр. Бар ғүмерҙәрен балаларға белем-тәрбиә биреүгә бағышлаған яҡын кешеләребеҙҙең тормош юлы беҙҙә ҙур ғорурлыҡ һәм ҡыҙыҡһыныу уята, уҡытыу эше барыбыҙҙы ла үҙенә тарта.
Мин дә уҡытыусы тигән бөйөк исемде йөрөтә алыуым менән сикһеҙ ғорурланам. Әгәр ҙә уҡыусыларым киләсәктә үҙ урындарын табып, бәхетле тормош ҡорһалар, мин дә бәхетле буласаҡмын.
Гүзәл НИЗАМОВА.
Әлшәй районы,
Ҡыпсаҡ-Асҡар ауылы.