Тәүге көндәрҙә игеҙәктәрҙе Ләйсәндең бер туған апаһы ҡараша. Стәрлебаш, Көйөргәҙе райондарында йәшәүсе олатай-өләсәйҙәр ҙә ейәнсәрле булыуҙарына һөйөнөп бөтә алмай, ярҙамдарынан өҙмәйҙәр.
Баштараҡ Гөлнара менән Илнараны тик ата-әсәһе генә айыра. Башҡалар кеме – Гөлнара, кеме Илнара икәнен аныҡ ҡына әйтә алмай. Атай менән әсәй тиҙерәк таныу уйы менән тәнәйҙәренең маңлайына йәшел, ҡыҙыл төҫлө ҡара менән төртөп ҡуя. Ярай әле 5 йәшкә етеүгә Илнараның танауына Хоҙай бер миң билдәһе насип итә. Ҡәҙерлеләрен үҫтергәндә йәш ата-әсә төрлө ҡыҙыҡ хәлдәргә лә тарый. Ата кеше иртән эшкә сыҡҡанында ике урынлы үҙ коляскаларының урамда тороуын шәйләп ҡала. Баҡһаң, саф һауала йөрөп ингәндән һуң балаларҙы өйгә ташығанда ул тышта онотолоп ҡалған икән...
Кескәйҙәр имгәкләп йөрөй башлағас, бөтә аяҡ кейемдәрен йәшереп ҡуйырға тура килә. Ике ҡыҙ ҡулына эләккән әйберҙәр иҙәнгә тула шул. Телдәре асыла төшкәс, улар алдына сығырмын тимә! Береһенән-береһе уҙҙырып, үҙҙәренсә тәтелдәшәләр, үҙҙәренсә аңлашалар!.. Бәләкәйҙән сос була улар. 3 – 4 йәшлек саҡтарында ғаилә Себер яҡтарында йәшәп ала. Балалар баҡсаһында тәрбиәселәре һәр береһенән һорай икән: «Атайығыҙҙың исеме нисек? Ҡайһы яҡтан килдегеҙ?» – тип. «Иван, Пётр, Александар, Андрей...» тигән яуаптарҙы ишеткән Илнара, сират үҙҙәренә килеп еткәс, апаһынан алда: «Нашего папу зовут Максим», – тип ышаныслы яуап биргән. Атаһын Рәжәп тиер ине, «р» хәрефен әйтә белмәй («Жәпәт» тип булмай бит). Гөлнара: «Мы приехали из Шипая», – тип ҡушылған. Башҡортостанданбыҙ, тип әйтеү тиҙ генә башына килмәгән. Стәрлебаш районы Йәлембәт ауылын халыҡ телендә «Шипай» тип йөрөтәләр икән. Тәрбиәсе быларҙы ала килгән әсәләренән: «Һеҙҙең ирегеҙ урыҫмы? Шипай ниндәй ҡала ул?» – тип һораған. Ҡыҙҙарының тапҡыр яуабына ҡыуанған әсә барыһын да аңлатып биргән. Уҡыуға төшкәс, уҡытыусы игеҙәктәрҙең үҙҙәренән һорай икән: «Баһаны кемегеҙгә тип ҡуяйым?» Төҫ яғынан оҡшашлыҡҡа һылтанып, ҡыҙҙарҙың мутлашҡан осраҡтары ла булғандыр. Әлегә улар был серҙәрен асманы.
Быйыл Гөлнара һәм Илнара Ҡотләхмәтовалар Стәрлетамаҡ ҡалаһының 20-се мәктәбендә VI «Б» синыфында уҡый. Икеһе лә тик «дүртле» һәм «бишле» билдәләренә өлгәшә. Әҙәбиәт дәрестәрен көтөп алалар. Гөлнара инглиз теленә өҫтөнлөк бирә, компьютерҙы үҙ итә. Илнара тарих менән ҡыҙыҡһына, берәй эш башҡарыр алдынан төплө уйлап ала. Ҡайһы саҡ әсәһенә лә урынлы кәңәштәр биргеләй.
Был игеҙәктәр аэробика, волейбол түңәрәктәрендә лә шөғөлләнгәндәр, саңғыла йөрөргә әүәҫтәр. Иллюстрациялар төшөрөүгә оҫталар. Аш-һыу әҙерләүҙә, йорт эштәрендә әсәләренә оло ярҙамсылар. Ауылға ҡайтҡан арала ла ҡул ҡаушырып ултырмайҙар, башҡармаған эштәре юҡ.
Бер төрлө кейемдә килгән ҡыҙҙарҙы урамда осратҡан инәй-апайҙар уларҙы тотоп һөйөп китә. Гөлнара менән Илнараның маҡсаттары ҙур. Киләсәктә уҡытыусы һөнәрен һайламаҡсылар.
Зөһрә ҮТӘҒОЛОВА.
Стәрлетамаҡ ҡалаһы.