Нәҫелендә бил бирмәҫ батырҙар булғанғалыр, Атанбаевтарҙың улдары Рифат та милли көрәш менән яратып шөғөлләнә. Уның бер туған олатаһы Рәил Атанбаев – ауылдың беренсе көрәшсеһе.
Йомағужа мәктәбенең V синыфында уҡып йөрөгән малай тиҫтерҙәре араһында спорт буйынса алдынғылыҡты бирмәй, көрәш, саңғы ярыштарында байтаҡ уңыштар яулап өлгөргән. Бынан тыш, төрлө мәҙәни сараларҙа ла әүҙем ҡатнаша, үҙ аллы гармунда, гитарала уйнарға өйрәнгән.
Өй эштәрендә лә ата-әсәһенең уң ҡулы. Мал ҡарау ҙа күпселек уның иңенә төшә. Тырыш булып үҫеп килгән Рифат быйыл ҡыш үҙе йыйған аҡсаһына йорт ҡуяндары һатып алған.
– Көн дә шуларҙы ҡарап, ашатып, матур итеп тәрбиәләй. Ҡартатаһы биргән ҡолон да үрсеп, өсәү булып киткәйне, уларҙы ла ҡараша. Береһен һуғымға һуйҙыҡ. Мал йәнле инде Рифатыбыҙ. Мәктәптән ҡайтҡас та шулар янына ашыға, – ти улы тураһында әсәһе.
Айгөл АЙЫТҠОЛОВА.
Йылайыр районы, Сәләх ауылы.