Ярай әле эргәмдә һеңлем бар

Ул тыуғанда миңә ни бары 3 йәш кенә булған. Үҙенә исемде өләсәйем һайлаған: «Бер-береһенә иш, үҙ-ара татыу, дуҫ булһындар. Зөлхизәгә оҡшатып, Зөлфиә тип ҡушығыҙ!» – тигән.
Әйткәне хуш килде өләсәйемдең. Мин Зөлфиәне ныҡ яратам. Үҙен ҡа­рап ҡына йөрөтәм. Һәр ваҡыт бергә­беҙ. Бәләкәйерәк саҡта беҙҙе күргән кешеләр: «Һеҙ игеҙәктәрме?» – тип һорай торғайны. Әсәй бер иштән кейендереп ебәрһә, бигерәк тә оҡшашбыҙ шул.
Мин сәнғәт мәктәбенә йөрөй башлағас, ул да шунда барҙы. Тәүҙә һүрәт төшөрөү менән шөғөлләнде. Һуңғы осорҙа музыкаға өҫтөнлөк бирҙе – гитарала уйнарға өйрәнә. Мин уның оҫта музыкант булырына ышанам.
Һеңлем һәр эшкә яуаплы ҡарай, уҡыу­ҙа ла алдынғылар рәтендә. Шуның өсөн дә уның фотоһүрәте мәктәбебеҙҙең «Уҡыу алдынғылары»таҡтаһын биҙәй.
Зөлфиә менән йәйге каникулды ла бергә үткәрәбеҙ. Быға ҡыуанам да, ярай әле эргәмдә һеңлем бар.

Зөлхизә ИСҠУЖИНА.
Хәйбулла районы, Аҡъярҙағы 1-се мәктәп.