Был үҫемлектә С витамины бик күп. Каротин, тимер, никель, баҡыр, марганец, титан, бор кеүек кеше организмына кәрәкле минералдар ҙа етерлек.
Кемдер балтырғанды һурпаға һалып бешерә. Әммә улай үләндең үҙенсәлекле тәме юғалалыр. Әйҙәгеҙ, беҙ өләсәйҙәр өйрәткәнсә әҙерләйек. Иң тәүҙә кәстрүлдә һыу ҡайнатып алабыҙ. Сама менән тоҙ, 3 – 4 картуф әрсеп, турап һалабыҙ. Ул бешә тора, ә беҙ балтырғанды сайҡатып, ваҡлап турайбыҙ. Уның өҫтөнә 2 йомортҡа һытып, яҡшы ғына итеп ыуабыҙ һәм кәстрүлгә һалып ебәрәбеҙ. Ыумаслы балтырған ашы бигерәк тәмле була. Бер йомортҡа менән ыумас ыуып, ашҡа әҙләп кенә төшөрөп, етеҙ генә болғатабыҙ. Һуған турап һалабыҙ.
Ашыбыҙ беште. Яңы айыртылған шыйыҡ ауыл ҡаймағы һалып тороп ашаһаң, телеңде йоторлоҡ тәмле була. Тәрилкәгә бер ҡалаҡ һалып бутайбыҙ. Йәшел һуған да һибергә мөмкин. Был ашты яҙ һайын өс тапҡыр бешереп ашау файҙалы, тигән боронғолар.
Фото: Фәнүзә Хәлитова сәхифәһенән.