Балалар алдында эскәнгә штраф түләйҙәр

Балаларҙың иҫерткес эсемлек эсеп,  ғүмерҙәре өҙөлөүе башҡа һыймаҫлыҡ хәл түгелме ул? Ҡыҙғанысҡа ҡаршы, күп атай-әсәйҙәр үҙҙәре дөрөҫ тәрбиә бирмәй, байрамдарҙа улар өсөн балалар шампан шарабы алып, сәкәштереп тороп эсергә өйрәтәләр.

Ә тамам эскелек ҡолона әйләнгәндәрҙең улдарына, ҡыҙҙарына бөтөнләй иғтибары етмәй. Шул арҡала күпме фажиғә була?! Әйткәндәй, һуңғы ваҡытта Вологда ҡалаһында балиғ булмағандар эштәре буйынса комиссиялар балалары алдында спиртлы эсемлек эскән атай-әсәйҙәргә  Рәсәй Федерацияһының административ хоҡуҡ боҙоуҙар тураһындағы кодексының 5.35-се статьяһы буйынса штраф һала башлаған. Маҡсаттары: өлкәндәр хаталарын аңлап, иғтибарҙарын араҡыға түгел, ә балаһына йүнәлтһен. Әлбиттә, бында ғаиләһен ҡарамай, әллә нисә көн буйы эскән кешеләр күҙ уңында тотола. Ундайҙар тураһында тейешле хеҙмәттәргә күршеләре, хатта балалар үҙҙәре лә хәбәр итә ала икән.

Фото: psyfiles.ru