Әле был юлы кемегеҙгә күпме кәнфит эләкте: атайҙың, әсәйҙең эшенән, синыфтан Ҡыш бабай күстәнәсе – ярты килограмдан ғына иҫәпләгеҙ әле. Шуны күп балалар тиҙ арала ашап бөтә. Ә бит тәм-том тештәргә генә түгел, ашҡаҙанға, нервы системаһына ла зыянлы. Аллергия тыуҙыра, иммунитетты ла түбәнәйтә. Тиҙ үҙләштерелә торған ризыҡтар – кәнфит, шоколад, мармелад, печенье һәм башҡалар организмға күпләп глюкоза бирә.
3 йәшкә тиклемге балаларға тәм-томды бөтөнләй ашатмаһаң да була. Улар глюкозаны бутҡа, макарон, емештәрҙән дә етерлек кимәлдә ала. Кәнфит, шоколадты кипкән емештәр менән алмаштырыу файҙалы. Шәкәрҙе әҙерәк һалып, өйҙә тәмлекәстәр бешереү ҙә отошло.