Мандарин ҡабығын ташламағыҙ!

 Ҡабығында эфир майҙары, фитонцидтар, каротиноидтар, витаминдар, антиоксиданттар һәм башҡа шифалы матдәләр бар. 

Мәҫәлән, эс ташҡанда, киткәндә мандариндың кипкән ҡабығын кофемолкала онтап, эремсеккә, бутҡаға, башҡа ризыҡҡа ҡушып (ярты-бер балғалаҡ тирәһе) ашарға мөмкин.

Бронхит менән яфаланғанда ла ҡулланалар уны. Ике ҡалаҡ онтаҡҡа стакан ярым ҡайнар һыу ҡойоп, биш минут ҡайнатҡас, бер сәғәт төнәтеп, һөҙөп алырға. Эсемлекте ашарҙан ярты сәғәт алдан ярты стаканлап йылы килеш эсергә.

Ҡоро йүтәлдә тиҙерәк үпкә таҙарһын өсөн дә шул рәүешле ҡулланырға мөмкин. Киҙеү мәлендә, һыуыҡ үткәреп ауырығанда мандарин тышы ярҙамында ингаляция эшләү яҡшы һөҙөмтә бирмәй ҡалмай. Уның өсөн йыйылған ҡабыҡҡа ҡайнар һыу ҡойоп, башты ҡаплап, быуҙы 10-12 минут һуларға. Бындай дауанан һуң йылы әйбер ябынып бер сәғәт ятып торорға кәңәш ителә.

Йоҡлай алмағанда, йөрәк тулағанда, ҡан баҫымы күтәрелгәндә лә мандарин ҡабығы ярап ҡала. Бер стакан яңы әрселеп ваҡланған ҡабыҡҡа өс литр ҡайнар һыу ҡойғас, ҡайнатып сығарырға, бер сәғәт тирәһе ултыртып торорға һәм һөҙөргә. Уны ваннаға ҡойоп, һыу өҫтәп (йылы булһын), йоҡларҙан ярты сәғәт алда 15 минут шунда төшөп ятырға. Мандариндың хуш еҫе тынысландырыу көсөнә эйә.

Әҡлимә ҒИЗЗӘТУЛЛИНА.

Сығанаҡ: bashgazet.ru

Фото: land.ru