-6 °С
Болотло
Бөтә яңылыҡтар
Бәйгеләр
20 Декабрь 2019, 12:40
«Беренселәр» – беренсе!
Мәғарифты үҫтереү институтында тәүге тапҡыр «Тел серҙәре» тигән интеллектуаль уйын ойошторолдо. Башҡорт теле көнөнә арнап уҙғарылған сарала баш ҡалабыҙҙың милли белем усаҡтарынан дүрт команда көсөн һынаны.
Был уйын беренсе тапҡыр ғына үткәрелеүгә ҡарамаҫтан, уҡыусылар, уҡытыусылар өсөн бик мауыҡтырғыс һәм фәһемле булды. Һынау үҙҙәре менән таныштырыуҙан башланды. Һәр береһе сәхнәгә сығып, командаһының исемен һәм девизын яңғыратты. Фатима Мостафина исемендәге 20-се башҡорт гимназияһы уҡыусылары – «Осҡон», республика инженер интернат-лицейыныҡылар – «Рух инженерҙары», Рәми Ғарипов исемендәге 1-се республика башҡорт интернат-гимназияһынан килеүселәр – «Беренселәр», Мостай Кәрим исемендәге 158-се башҡорт гимназияһы уҡыусылары үҙҙәрен «Башҡорттар» тип атаған.
Киләһе эш төрөн иғлан итер алдынан Фатима Мостафина исемендәге 20-се башҡорт гимназияһында эшләп килгән «Ләйсән» бейеү ансамбле етәксеһе Луиза Ғәлина башҡорт бейеүе хаҡында һөйләп, уның элементтарын башҡарып күрһәтте. Унан һәр команданан биш уҡыусы саҡырып сығарылды. Улар ҡуйылған милли көйҙәргә төрлө хәрәкәттәр яһап, бейеп күрһәтергә тейеш ине. Афарин, балалар, бик матур килеп сыҡты! Тамаша залына йыйылыусы уҡытыусылар, көйәрмәндәр ҙә тик ултырманы, уйында ҡатнашыусылар менән бергәләп «Башҡорт бейеүен бейейем» флешмобында ҡатнашты.
Уйында ҡыҙҙар һәм егеттәрҙең башҡорт теле һәм әҙәбиәте буйынса белемдәре лә тикшерелде. Командаларға сиратлап «Башҡортостан Республикаһының тыуған көнө», «Башҡортостан гимны авторҙары», «Тыуған ил, туған тел тураһында башҡорт халыҡ мәҡәлдәре», «Башҡорт телендә нисә килеш бар?», «Синтаксис нимә өйрәнә?» кеүек 10 һорау тәҡдим ителде. Уларҙың һәр береһенә 1 минут эсендә генә яҙма яуап биреп өлгөрөргә кәрәк ине.
Ә башҡорт теле һәм әҙәбиәте дәрестәрен нисек ҡыҙыҡлыраҡ итеп үткәрергә була? Киләһе һынауҙа һәр команда ошо һорауға яуап эҙләне, уй-фекерҙәрен уҡып ишеттерҙе.
Әкиәт яҙып, уны шунда уҡ ролдәргә бүлеү, сәхнәләштереп тә күрһәтеү етеҙлекте талап итә ине. Был һынауҙы рәхәтләнеп көлә-көлә ҡараныҡ.
Интеллектуаль уйын барышында һәр командаға тиҙ арала фотоға төшөп, «Инстаграмм» селтәренә Мәғарифты үҫтереү институты хештегы менән һалырға ҡушылғайны. Кем унда иң күп лайк йыйҙымы? «Осҡон» командаһы. Уларҙың фотоларына 173 кеше лайк ҡуйған. Командаға бергәләп сәй эсергә торт бүләк ителде.
Абруйлы баһалама төркөмө һәр сығышты иғтибарлап ҡарап, мәрәйҙәр ҡуйып ултырҙы. Барлыҡ һынауҙарҙы уңышлы үтеп, Рәми Ғарипов исемендәге 1-се республика башҡорт интернат-гимназияһының «Беренселәр» командаһы еңеүсе тип табылды, икенсе урында – «Башҡорттар», өсөнсө урындарҙа – «Осҡон» һәм «Рух инженерҙары». Уйын һәр кемде рухландырып, ҡанатландырҙы.
Өфө ҡалаһы.
Читайте нас:
Редакция һайлауы
Новости партнеров
Гәзитебеҙ - дуҫыбыҙ
Фильмдар
Күңелдәрҙең иләҫ-миләҫ сағы
© 1930 йылдың 12 февраленән нәшер ителә. Ойоштороусылары: Башҡортостан Республикаһының Матбуғат һәм киң мәғлүмәт саралары агентлығы, Башҡортостан Республикаһының «Башҡортостан Республикаһы» нәшриәт йорто дәүләт унитар предприятиеһы. Баш мөхәррире — Мирсәйет Ғүмәр улы Юнысов.
Башҡортостан Республикаһы буйынса элемтә, мәғлүмәт технологиялары һәм киңкүләм коммуникациялар өлкәһендә күҙәтеү буйынса федераль хеҙмәт идаралығында 2015 йылдың 18 авгусында теркәлде. Теркәү номеры — ПИ №ТУ02-01403.
Республиканский информационный центр – филиал государственного унитарного предприятия Республики Башкортостан Издательский дом «Республика Башкортостан».
Р./счёт 40602810200000000009 в Филиал ПАО «БАНК УРАЛСИБ» в г. Уфа, БИК 048073770, ИНН 0278066967, КПП 027843012, к/с 30101810600000000770.
Телефон
+7 347 273-36-64, +7 999 133-44-62.
Электрон почта
Адресы
450079, г. Уфа, ул. 50-летия Октября, 13, 8-й этаж