Велосипед, тәгәрмәсле коньки, скейтборд отҡоң килһә...

«Башҡорт» йәмәғәт ойошмаһы балалар өсөн «Ҡуштау — беҙҙең хазинабыҙ!» тип аталған рәсемдәр конкурсы иғлан итә. Был турала улар «Бәйләнештә» социаль селтәрендәге төркөмдәрендә хәбәр итә. Бәйгенең шарттары буйынса, 14 йәшкә тиклемге балалар, Ҡуштау менән бәйле һүрәт төшөрөп, шул хаҡта ҡыҫҡаса мәғлүмәт яҙып ебәрергә тейеш.

Конкурс 1 февралдән 29 февралгә тиклем бара. Мәғлүмәтте (авторҙың исем-шәрифе, ниндәй райондан булыуы һәм йәше мотлаҡ күрһәтелһен) ата-әсәләр ярҙамында яҙырға мөмкин, ә һүрәтте баланың үҙенең ижад итеүе мотлаҡ. Ҡатнашыусылар үҙ эштәрен фотоға төшөрөп, «Башҡорт» йәмәғәт ойошмаһы төркөмөнә https://vk.com/boobashkort шәхси хат итеп ебәрергә бурыслы.

Еңеүселәр 3 март көнө асыҡланасаҡ. Иң үҙенсәлекле һүрәт, иң йәш ҡатнашыусы һәм иң күп лайк йыйғандар махсус приздар менән бүләкләнәсәк. I, II, III урындар айырым билдәләнә. Еңеүсегә – велосипед, икенсе урынға – тәгәрмәсле коньки, өсөнсө урынға скейтборд тапшырыласаҡ.

Читайте нас: