+27 °С
Ясно
Бәйгеләр
25 Марта 2021, 11:56
Республика Ҡурай байрамына ғаризалар ҡабул ителә
Ғата Сөләймәнов исемендәге республика Ҡурай байрамына ғаризалар ҡабул ителә башланы. Быйыл ул 21 – 22 майҙа Октябрьскийҙа егерменсе тапҡыр уҙасаҡ. Бында үҙешмәкәр, профессиональ солистар һәм ҡурайсылар ансамблдәре ҡатнашырға саҡырыла.
Башҡарыу оҫталығы өс йәш үлсәме буйынса ҡараласаҡ.12 йәшкә тиклемгеләр, 12-нән 16 йәшкә тиклемгеләр бер турҙа ғына көс һынашып, оҙон һәм ҡыҫҡа көй уйнап күрһәтәсәк. Ә 16-нан өлкән йәштәге ҡурайсылар ике турҙа ярышасаҡ. Был йәш үлсәмендә үҙешмәкәр солистар һайлау буйынса 4 әҫәр тәҡдим итәсәк. Ә ҡурай синыфы буйынса һөнәри белеме булғандарға билет буйынса оҙон көйҙө уйнау оҫталығын күрһәтергә кәрәк буласаҡ. Ҡурайсылар ансамблдәре бер турҙа, ике йәш үлсәмендә көстәрен һынаясаҡ.
Әйткәндәй, Ғата Сөләймәнов исемендәге республика Ҡурай байрамы 2000 йылдан үткәрелә. Уны Башҡортостандың Мәҙәниәт министрлығы, республика халыҡ ижады үҙәге, Октябрьский ҡалаһының ҡала округы хакимиәте ойоштора.
Ҡатнашыу өсөн ғаризалар 15 майға тиклем ошо электрон почталар буйынса ontrcnt@bk.ru, oktb-kultura@mail.ru ҡабул ителә. Ойоштороу һорауҙары буйынса ошо адрес һәм телефон буйынса мөрәжәғәт итергә була: 450103, Өфө ҡалаһы, Зәйнәб Биишева урамы, 17/2, республика халыҡ ижады үҙәге, 8 (347) 289-65-50. Байрам өсөн яуаплы – Эльвира Искәндәр ҡыҙы Әхмәтйәнова.
Гәзитебеҙ - дуҫыбыҙ
Фильмдар
Күңелдәрҙең иләҫ-миләҫ сағы
