"Байыҡ" еңеүселәрен ҡотлайбыҙ!

Һайлап алыу турында 1 мең 500 бала ҡатнашҡан. Баһалама комиссияһы иң оҫта бейеүселәрҙе һайлап алған. Финалға сығыусыларҙың Гала-концерты Өфөлә «Башҡортостан» дәүләт концерт залында булды. Унда 300-ләгән бейеүсе ҡатнашты. Башҡорт бейеүенә йәш быуын тарафынан да иғтибар, ихтирам арта. Элекке матур бейеүҙәр тергеҙелә, яңылары ла һалына. Уларҙа халҡыбыҙ тарихы, менталитеты сағылыш таба.
Быға тиклем Гала-концертта Греция, Төркиә, Үзбәкстан, Ҡаҙағстан, Украина илдәренән, Чечен, Ҡабарҙы-Балҡар, Татарстан, Бүрәт, Осетия, Хакасия республикаларынан бейеү коллективтары ҡунаҡ булараҡ сы­ғыш яһай торғайны. Пандемия географияны сикләне.

Быйылғы «Байыҡ»тың еңеүселәре кемдәр һуң? «Яңғыҙ бейеү» номи­нацияһында Белорет районынан «Маршрут» бейеүен башҡарған Илвир Мырҙағәлин иң-иңе тип табылды. «Дуэт» номинацияһында Ейән­суранан «Рекрут» бейе­үен башҡарған Динияр Сәйфуллин менән Рус­лан Юлдыбаев – еңеү­се.
Ансамблдәр араһында Әбйәлилдән «Алтынай», Күгәрсендән «Гөрләүек» өлгөлө ансамблдәре, Учалынан «Уралтау» балалар хореография студияһы Гран-приға лайыҡ булды. Маладистар!
Учалы филармония­һының «Уралтау» бейеү ансамбле ҡарамағындағы «Уралтау» балалар бейеү студияһында дүрт йәштән дүрт төркөмдә шөғөлләнәләр икән. Йәш бейеүселәр аҙна­һына өсәр, дүртәр тап­ҡыр дәрестәрҙә бейеү серҙәренә төшөнә. Етәк­селәре Фәнилә һәм Азат Буранбаевтар төрлө бейеүҙәр өйрәтә, шулай ҙа башҡорт бейеүенә өҫтөнлөк бирәләр, әлбиттә.
– Студиябыҙ 5 йыл эшләй. Төрлө конкурстарҙа ҡатнашып, Гран-при, I урындар алып торабыҙ, Аллаға шөкөр. Солистарыбыҙ Камила Боровик, Айназ Аманов, Динислам Ғимаев менән ғорурлана алабыҙ. Коллектив менән сит илдәр­ҙә – Төркиәлә, Әзербайжанда фестивалдәрҙә ҡатнаштыҡ. Ә «Байыҡ»­ҡа 12 парҙан торған өлкән төркөм менән килдек. Фәйзи Ғәскәровтың «Беҙҙең байрам» тигән бейеүен күрһәттек. Еңеү­се булғас, балалар бик шатланды, әлбиттә. Ал­ла бирһә, киләһе йылдарҙа ла «Байыҡ» телевизион конкурсында ҡат­нашырға уйлайбыҙ. «Байыҡ» проектының етәксеһе Рита Өмөт­баеваға һәм уның ко­мандаһына ҙур рәхмәтебеҙҙе белдерәбеҙ. Гала-концерт шаулап-гөрләп үтеп китте. Байрам балаларға бик оҡшаны. Уны ойоштороу­сыларға артабан да ижади уңыш­тар теләп ҡалабыҙ, – ти Фәнилә Буранбаева.
Әйткәндәй, Учалылар­ҙан Айназ Аманов «Генерал Игеҙәков» бейеүе менән соло номинация­һында лауреат булды. Ә «Уралтау» балалар бейеү студияһы етәксеһе Азат Буранбаев «Иң яҡ­шы етәксе – 2021» исемен алды.
Конкурс республиканың йәш бейеүселәре араһында ғына түгел, бейеү коллективтары етәкселәре араһында ла киң танылған проект, аралашыу, тәжрибә уртаҡлашыу майҙансығы ла булып тора.

Эльвира ӘСӘҘУЛЛИНА.