Гран-при - Күгәрсендән Хөснуллиндарға

Шуныһы ҡыуаныслы, конкурста күрше өлкәләрҙән дә ҡатнашыусылар булды. Ә Ҡурған өлкәһенән Ғәлиевтар һәм Ханты-Манси округынан Ҡәйепҡоловтар финалға сыҡты. Бәйгенең йомғаҡлау этабында шулай уҡ республиканың 23 төбәгенән башҡорт ғаиләләре  ҡатнашты. 

"Өлгөлө башҡорт ғаиләһе - 2022" асыҡ республика конкурсында Гран-приға Күгәрсен районынан Гөлгөнә һәм Урал Хөснуллиндар ғаиләһе лайыҡ булды. Еңеүселәргә 100 мең һум күләмендә аҡсалата бүләк тапшырылды. Был матур, рухлы ғаилә Дилә исемле ҡыҙ һәм Ирхан исемле ул тәрбиәләп үҫтерә.

Финалда ҡатнашҡан өлгөлө башҡорт ғаиләләре “Ғаилә ҡиммәттәре”, “Ғаилә кәсебе”, “Ғаилә ижады” номинацияларында, шулай уҡ  “Бейеүсе ғаилә”, “Моңло ғаилә”, “Һәләтле ғаилә”, “Мираҫлы ғаилә”, “Егәрле ғаилә”, “Маһир ғаилә”, “Татыу ғаилә” кеүек номинацияларҙа билдәләнде. Бөтә лауреаттар ҙа Мәҙәниәт министрлығының дипломдарына һәм ҡиммәтле бүләктәргә лайыҡ булды. 

Әйткәндәй, был күркәм сара 1 март - Башҡорт ғаиләһе көнө алдынан уҙҙы. 

Фото: БР Мәҙәниәт министрлығы.