Ошо дәүер эсендә башҡорт КВН-ы аша бик күп йәш милләттәштәребеҙ үтте, улар тәүге тапҡыр баш ҡала сәхнәһенә сығып, артабан һәләттәрен арттырыр өсөн тәжрибә тупланы.
22 мартта Өфөнөң мәҙәниәт һәм ял үҙәгендә «Шаяниум» конкурсының финалы булды. Унда ҡатнашыусы командалар составында кескәй генә ҡыҙҙар һәм малайҙарҙың да күп булыуы өмөт уята. Тимәк, ҡала ерендә туған телебеҙҙә бик матур һөйләшкән балалар күбәйә, ғаиләләрендә лә башҡортса ғына аралашалар, оҫта итеп шаярта ла беләләр! «Шаяниум»дың төп маҡсаттарының береһе үҫеп килеүсе быуында туған телгә һөйөү тәрбиәләү түгелме ни?!
Быйыл уйында Өфөнән 32 команда ҡатнашҡан. Ярымфиналға ҡаланың район этаптарында уңышлы сығыш яһаған 16-һы сыҡҡан, 9-ы иһә финалда көс һынашты. Уларҙың сығыштарын милләтебеҙҙең алдынғы ҡарашлы танылған шәхестәренән торған абруйлы жюри баһаланы. Уйындың девизы – «Ғүмер ҡыҫҡа – уҙғарма бушҡа».
«Шаяниум»дың еңеүселәре кемдәр, тиһегеҙме?
III урынға өс команда лайыҡ булды: 122-се башҡорт гимназияһының «Ша-шу-ша», Мөхәмәт Исҡужин исемендәге 136-сы башҡорт лицейының «Һупайлы дәрүиштәре» һәм 48-се башҡорт лицейының «Сәтәкәй» отҡорҙары һәм тапҡырҙары.
II урында – Фатима Мостафина исемендәге 20-се ҡала башҡорт гимназияһынан «XX централ», Ғәли Ибраһимов исемендәге 2-се башҡорт лицейынан «Тағы ла 2».
I урында – 1-се республика полилингваль күп йүнәлешле гимназияһынан «Ҡырғаяҡтар».
Гран-при Мостай Кәрим исемендәге 158-се башҡорт гимназияһының «Кендектәр» командаһына тапшырылды.
Һәр йылдағыса, «Иң яҡшы ҡатын-ҡыҙ роле» һәм «Иң яҡшы ир-егет роле» номинациялары еңеүселәре лә билдәләнде. Улар – «Тағы ла 2» командаһынан Ангелина Халиҡова һәм «Ша-шу-ша»нан Алсынбай Ғарифуллин.
«Иң берҙәм команда» номинацияһында – «Етегән+1» (Рауил Бикбаев исемендәге 102-се башҡорт гимназияһы), «Милли колорит»та Зәйнәб Биишева исемендәге 140-сы башҡорт гимназияһынан «Ығы-зығы» бүләкләнде.
Урыҫ мәктәптәренән дә командалар ҡатнашыуы ҡыуандыра. 4-се мәктәптең «Затонград»ы былтыр «Йыл асышы» номинацияһына лайыҡ булғайны, быйылғы «Шаяниум»да ла һынатманы улар: уҡытыу урыҫ телендә алып барылған мәктәптәр араһында I урын алдылар. 113-сө мәктәптең «Искәндәр бабай», Максим Горький исемендәге 3-сө гимназияның «Мариин билмәндәре», 45-се мәктәптең «15 минуттан» командаларын да маҡтап телгә алып үтке килә. Хәйер, «Шаяниум»да ҡатнашҡан, балаларҙы еңеүгә дәртләндергән, конкурсҡа әҙерләгән һәр кемгә: «Афарин!» – тип әйтергә була.
– «Шаяниум»да дүртенсе тапҡыр ҡатнаштым инде. Шул ваҡыт эсендә үҙемә күп дуҫтар таптым, хәбәрләшеп торабыҙ. Быйыл беҙгә конкурсҡа әҙерләнергә Вилдан ағай Фәйзуллин ярҙам итте, уға ҙур рәхмәт. Миниатюраларҙың ҡайһы берҙәрен команда ағзалары үҙ тормоштарында булған ҡыҙыҡлы мәлдәрҙән алды. «Шаяниум»да минең өсөн иң мөһиме – ҡатнашыу, яңы кисерештәр алыу, яңы дуҫтар табыу, ә Гран-при икенсе планда ине. Сәхнәлә сығыш яһағанда тамашасыларҙан шундай көслө энергия һәм илһам алаһың! – тип тәьҫораттары менән уртаҡлашты «Кендектәр» командаһы капитаны Шайморат Ҡарасов.
Ул ҡурайҙа уйнай, инглиз теле курсында, кикбоксинг секцияһында шөғөлләнә икән. Быйылғы бәйгелә «Шаяниум»дың бағымсыларының береһе – «Күреү оҫтаһы» оптика селтәре етәксеһе Динар Шаһиевтың махсус призына лайыҡ булды. Гран-при алған Мостай Кәрим исемендәге 158-се башҡорт гимназияһы командаһында шулай уҡ VIII синыфтан Тамерлан Юнысов, Салауат Иманғолов, етенсенән Айгүзәл Мортаева, Наҙгөл Ҡолтаева һәм Зөлхизә Ҡорбанғолова уйнаны. Барыһы ла бөтә сараларҙа әүҙем ҡатнашыуҙары, телһөйәр булыуҙары менән айырылып тора.
«Шаяниум»да ҡатнашҡан уҡыусылар киләсәктә тағы ла ҙурыраҡ уңыштарға өлгәшер, үҙҙәрен күрһәтер әле. Ана, бөгөн мультиинструменталист булып танылыу яулаған Заһир Зәйнетдинов та (Зәйнетдин) уҡыусы сағында Ғәзиз Әлмөхәмәтов исемендәге республика музыкаль тәрбиә биреү гимназияһынан «Ҡыҙыҡ мажор» командаһы капитаны булғайны. Ә ҡасандыр «Ша-шу-ша» составында уйнаған Батыр Ғәлимов – хәҙер республикала киң танылған «E7E-media» видео яҙҙырыу студияһына нигеҙ һалыусыларҙың береһе.
– Мин дә 2002, 2003 йылдарҙа 122-се башҡорт гимназияһының «Ша-шу-ша» командаһында уйнаным. Ул ваҡытта «солянка»ға ғына эләктек, финалға сығып булманы. Башҡорт-төрөк лицейы, Фатима Мостафина исемендәге 20-се ҡала башҡорт гимназияһы, 1-се республика башҡорт интернат-гимназияһы командалары көслө ине. Шул ваҡыттарҙа аралашҡан дуҫ егеттәрҙән Фидан Килмөхәмәтов (Кәкре Сүкеш) – «Ҡыҙыҡ мажор»ҙа, Радик Юлъяҡшин (Элвин Грей) – 48-се башҡорт лицейы командаһында, Урал Кәримов 136-сы башҡорт лицейының «Һупайлы дәрүиштәре»ндә сығыш яһай ине. XI синыфта уҡығанда Берҙәм дәүләт имтиханына әҙерләнеп, бәйгелә ҡатнашманым. Ә студент саҡта I, II курстарҙа дәрт, ваҡыт бар бит инде, директор менән һөйләшеп, үҙемдең командама «Шаяниум»ға әҙерләнергә ярҙам итергә булдым. Шунда шаяртыуҙар уйлап, сығышты музыкаль яҡтан биҙәү яғынан эшләп, үҙемде режиссёр булараҡ һынап ҡараным. «Ша-шу-ша» беренсе тапҡыр финалға эләкте, был, әлбиттә, ҡыуандырҙы.
Ул ваҡыттағы видеояҙмалар әле иҫтәлек булып һаҡлана. Хәҙер ҙә «Шаяниум»ды күҙәтеп барам. Был конкурста ҡатнашыу илһамландыра, дәрт бирә. Кемдер үҙенең көслө яҡтарын, нимәгә һәләтле икәнен белеп ҡала. 20 йыл буйы «Шаяниум»да ҡатнашыусылар араһынан күп уңышлы шәхестәр сыҡты: араларында етәкселәр, билдәле йырсылар, режиссёрҙар бар. Уҡыусылар өсөн киләсәккә ҙур аҙым бит был конкурс. «Шаяниум»ға рәхмәтлемен: бик күп дуҫтар, онотолмаҫ тәьҫораттар бүләк итте, – ти Батыр Ғәлимов.
Эльвира ӘСӘҘУЛЛИНА.