«GeoLing – Илгизәр» – полилингваль мәктәптәр өсөн үҙенсәлекле викторина. Һорауҙар башҡорт, урыҫ һәм инглиз телдәрендә төҙөлгән, «Урал батыр» эпосы, уның тарихы, Башҡортостан тәбиғәте, сәнғәте һәм мәҙәниәте буйынса һайланған. Ойоштороусылар әйтеүенсә, был уйында шулай уҡ тарихи фотолар, документтар, карталар һәм видеоматериалдар ҙа бар. Проектты тормошҡа ашырыуҙа БДУ-ның Стәрлетамаҡ филиалы программистары, уҡытыусылары, гейм-дизайнерҙары һәм ҡаланың 23-сө күп профилле полилингваль мәктәбе уҡытыусылары ҡатнашты. Өфө, Стәрлетамаҡ һәм Нефтекама уҡыу йорттары йәлеп ителде. Был ҡалаларҙа апрель айынан башлап ошо уйындар үткәрелә килде. Ойоштороусылар фекеренсә, сара балаларҙа тыуған яҡҡа һәм тәбиғәткә һөйөү уята. Патриотик тәрбиәгә лә был проекттың йоғонтоһо ҙур.
Ысынлап та, уҡыусылар уйын барышында үҙҙәренең туплаған белемен, туған теленә, мәҙәниәтенә битараф булмауҙарын күрһәтте. Викторинаның үткәреү форматы ла бик ҡыҙыҡлы: һәр һорауға 4 вариант яуап тәҡдим ителә, дөрөҫөн һайлаһалар, таблола йәшел ут яна, ә яңылыш булһа – ҡыҙыл. Йәнә шуны әйтеп китергә кәрәк, һорауҙар балл күләменә ҡарап ҡатмарлаша бара (100, 200, 300, 400 һәм 500 балл).
Проектта еңеүсе командалар өсөн бик үҙенсәлекле бүләктәр әҙерләнгән: өсөнсө урынға «Урал батыр» китабы һәм торт, икенсе урынға – Торатау геопаркына, беренсе урынға – Шүлгәнташ мәмерйәһенә сәйәхәткә юллама.
Йомғаҡлау уйыны бик ҡыҙыу һәм көсөргәнешле барҙы. III урынды Нефтекама ҡалаһынан «Балаян» менән баш ҡаланың Фатима Мостафина исемендәге 20-се башҡорт гимназияһының «Зирәктәр» командалары бүлеште, II урынға Стәрлетамаҡтағы 2-се интернат-лицейҙың «Арғымаҡ» командаһы лайыҡ булды, ә беҙҙең 23-сө күп профилле полилингваль мәктәптән «Йәншишмә» командаһы еңеү яуланы! Ошондай кәрәкле, заманса форматта уҙған сараны ойоштороусы етәкселәргә, ҙур теләк менән ҡатнашыусы бәйгеселәргә оло рәхмәттәребеҙҙе еткерәбеҙ.
Был зирәк, тапҡырҙар уйынына килгән ҡайһы бер ҡатнашыусылар һәм ҡунаҡтар үҙҙәренең фекере менән уртаҡлашты.
– Бөгөнгө бәйгегә көс һынашырға килгән бөтә ҡатнашыусылар ҙа – еңеүселәр, телен, илен һөйөүселәр. Был конкурс уникаль ҡомартҡыбыҙ – «Урал батыр» эпосын тағы ла ҡулға алып уҡырға, ата-бабаларыбыҙ аманатын иҫкә төшөрөргә мөмкинлек бирҙе. Ойоштороусыларға ҙур рәхмәт, республика күләмендә ҙур эш атҡарып сыҡҡанһығыҙ, – тине Өфө ҡалаһының 20-се башҡорт гимназияһының уҡытыусыһы Лилиә Тимерхан ҡыҙы Аҡбулатова.
– Беҙ балалар менән сәмләнеп, дәртләнеп ярышҡа килдек. Саҡырыуығыҙға рәхмәт, – тип үҙ фекерен еткерҙе Өфө ҡалаһының 2-се «Смарт» гимназияһы уҡытыусыһы Айгөл Мирзаян ҡыҙы Ҡотлозаманова. Стәрлетамаҡтың 2-се интернат-лицей уҡытыусыһы Бүләк Йыһангир ҡыҙы Ҡәйепҡолова әйтеүенсә, был проект «Урал батыр» эпосына ҙур ҡыҙыҡһыныу уятты, мәшһүр ҡомартҡыны тыуҙырыусы халҡыбыҙ тарихының байлығын, яҡшылыҡтың онотолмауын, «ил-ата» һүҙенең хаҡ булыуын тағы ла бер ҡат раҫланы.
Тапҡырҙар уйыны йәмле, йәнле нотала тамамланды. Урал батыр тоҡомдарының уҡыуҙа ла, илгә кәрәкле һөнәр һайлай белеүҙә лә һынатмаҫтарына ышандыҡ. Үҙ тәрбиәләнеүселәрен ҡыйыу һынау тоторға әҙерләгән коллегаларыбыҙға, остаздары ышанысын аҡлаған илһөйәр, телһөйәр уҡыусыларыбыҙға яңы еңеүҙәр, яңы ҡаҙаныштар теләйбеҙ.
Венера ВӘХИТОВА, уҡытыусы.
Стәрлетамаҡ ҡалаһы,
23-сө күп профилле
полилингваль мәктәп.