Быйыл ун өсөнсө тапҡыр үткәрелгән бәйгелә барлығы 970 бала бәхетен һынап ҡараған. Ә иң оҫта әкиәт һөйләүселәр иһә Мәжит Ғафури исемендәге Башҡорт дәүләт академия драма театры залына йыйылды. Матур милли кейемдәрҙә, төрлө йәнлек булып кейенеп килгән ҡатнашыусыларҙы тәбрикләргә мәртәбәле ҡунаҡтар ҙа саҡырылғайны.
– Уҙған йыл билдәле сәбәптәр арҡаһында йыйыла алмағайныҡ. Шуға конкурс онлайн форматта үтте һәм «Өләсәйем әкиәттәре» тип аталды, – тине Башҡорт ҡатын-ҡыҙҙары йәмғиәте рәйесе, Дәүләт Йыйылышы – Ҡоролтай депутаты Гөлнур Ғәлинур ҡыҙы Ҡолһарина. – Бөгөн күрешеүебеҙгә бик шатмын. Әкиәттәр изгелеккә, аҡылға, көскә эйә булған камил геройҙар аша баланы үҫтерә. Ҡатнашыусыларҙың күплеге йәмғиәтебеҙҙең ошондай матур сараларға битараф булмауын күрһәтә.
Йәш әкиәтселәрҙең сығышын һоҡланып ҡарап ултырҙыҡ. Береһенән-береһе уҙҙырып, оҫталығын күрһәтә. Беҙҙә күп икән дә әкиәт яратыусылар!
Бына иң тантаналы мәл етте. Еңеүселәр сәхнәгә күтәрелде.
Шулай итеп, «Йәнһүрәттәр һәм анимацион фильмдар» номинацияһында I урынды – 111-се гимназия уҡыусылары, II урынды – 330-сы, ә III урынды 129-сы балалар баҡсаһы тәрбиәләнеүселәре яуланы.
«Йәш әкиәтсе» номинацияһында I урынға – Динислам Нурмөхәмәтов (166-сы башҡорт балалар баҡсаһы), II урынға – Самина Әхмәтова (48-се башҡорт лицейы) менән Вилена Сафиуллина (2-се полилингваль гимназия), ә III урынға Карина Вилданова (97-се балалар баҡсаһы), Данис Раимов (Рауил Бикбаев исемендәге 102-се башҡорт гимназияһы), Самира Миңләхмәтова (Фатима Мостафина исемендәге 20-се башҡорт гимназияһы) лайыҡ булды.
«Әкиәттәр – халыҡ аҡылы хазинаһы» номинацияһында I урынға – Диана Әминева (103-сө мәктәп), II урынға – Самира Ғүмәрова (18-се мәктәп) менән Йәсминә Ураҙғолова (Фатима Мостафина исемендәге 20-се башҡорт гимназияһы), ә III урынға Лилиә Ғәбитова (52-се лицей) менән Арина Кәримова (141-се мәктәп) сыҡты.
«Ғаилә менән сәхнәләштереү» номинацияһында Сәғитовтар ғаиләһе (308-се башҡорт балалар баҡсаһы) Гран-при яуланы. I урында – Нәбиуллиндар (Мөхәмәт Исҡужин исемендәге 136-сы башҡорт лицейы), II урында – Ҡыуандыҡовтар (92-се мәктәп), III урында – Ишдәүләтовтар ғаиләһе (18-се башҡорт балалар баҡсаһы).
«Әкиәтте сәхнәләштереү» номинацияһында Мостай Кәрим исемендәге 158-се башҡорт гимназияһы уҡыусыларына етеүсе булманы. Улар Гран-при хужаһы булды. I урынды Мөхәмәт Исҡужин исемендәге 136-сы башҡорт лицейы уҡыусылары алһа, II урынды – 308-се башҡорт балалар баҡсаһы тәрбиәләнеүселәре һәм Фатима Мостафина исемендәге 20-се башҡорт гимназияһы уҡыусылары, ә III урынды 16-сы балалар баҡсаһы тәрбиәләнеүселәре һәм 75-се «Аҡбуҙат» балалар баҡсаһы фольклор коллективы бүлеште.
«Әкиәтте яңғыҙ башҡарыусылар» номинацияһында Марат Яубаҫаров (42-се мәктәп) менән Алмас Вәлиев (18-се башҡорт балалар баҡсаһы) иң-иңе булып танылды. Икәүһенә лә Гран-при бирелде. Ә I урынға – Асия Ғарипова (Фатима Мостафина исемендәге 20-се башҡорт гимназияһы), Мәҙинә Ғүмәрова (51-се башҡорт балалар баҡсаһы), II урынға – Әминә Аллабирҙина (Мөхәмәт Исҡужин исемендәге 136-сы башҡорт лицейы), Буранбай Әминев (40-сы башҡорт балалар баҡсаһы), III урынға Инсаф Юнысов (Мостай Кәрим исемендәге 158-се башҡорт гимназияһы), Аделина Тәкәева (102-се башҡорт балалар баҡсаһы) лайыҡ булды.
Сәмле ярыштың һәр еңеүсеһенә иҫтәлекле бүләктәр, Маҡтау ҡағыҙҙары тапшырылды.
Лилиә МӘҮЛИТОВА.
Өфө ҡалаһы.