"Аҡмулла" олимпиадаһында

Яңыраҡ баш ҡалабыҙҙың Мифтахетдин Аҡмулла исемендәге Башҡорт дәүләт педагогия университетында башҡорт теле олимпиадаһының 2-се туры үтте. Унда мин дә ҡатнаштым. Республикабыҙҙың төрлө район, ҡала мәктәптәренән, уҡыу йорттарынан ҡыҙҙар һәм егеттәр йыйылғайны.
Был этапта уҡыу­сыларҙың телмәр мәҙәниәтен тикшерҙеләр. Һәр ҡатнашыусы үҙе һайлап алған теманың проблемаһын билдәләп, уның тураһында тулы мәғлүмәт бирергә тейеш ине.
Аҙаҡ университет студенттары беҙгә төрлө-төрлө оҫталыҡ дәрестәре үткәрҙе. Ҡыҙҙарҙы – башҡорт бейеүҙәрен бейергә, матур-матур түшелдеректәр яһарға, егеттәрҙе ҡурайҙа уйнарға өйрәттеләр. Башҡортостан тураһында бәләкәй генә квиз-викторина ла ойошторолдо.
«Аҡмулла» олимпиадаһының еңеүселәрен, призёрҙарын июндә Өфө ҡалаһында оло тантана үткәреп бүләкләйәсәктәр.

Аделина ҒӘЛИШИНА, X синыф уҡыусыһы.
Миәкә районы, Тамъян-Таймаҫ мәктәбе.