Өфө тарихын бергәләп яҙайыҡ!

“Өфө тарихын бергәләп яҙайыҡ!” тип аталған ижади бәйгенең төп маҡсаттары – баш ҡалабыҙҙың тарихын һәм уның шәхестәренең биографияһын төплөрәк өйрәнеү, ғаилә ҡиммәттәренә хөрмәт, илһөйәрлек тойғоһо тәрбиәләү, үҫмерҙәрҙе һәм йәштәрҙе ғилми-тикшеренеү эшенә ылыҡтырыу.

VIII – XI синыф уҡыусылары, колледж һәм юғары уҡыу йорттары студенттары араһында үткәрелгән конкурс өс номинация буйынса ойошторола:

1. “Өфөлә тыуып үҫкән кешеләр – Рәсәйҙең арҙаҡлы шәхестәре” (эссе);
2. “Баш ҡаланы үҫтереүгә тос өлөш индергән яҡташымдың (йәғни ауылдашым, райондашымдың) тормош юлы һәм шәжәрәһе”;
3. “Өфө ҡалаһының йылъяҙмаһы” (тауышлы видеопрезентация).

Заявкаларҙы һәм конкурс эштәрен 1 февралгә тиклем электрон почтаға (urakaeva.aa@bashkortostan.ru) ебәрергә йәки Совет урамы, 7-се йорт адресы буйынса килтерергә мөмкин.

Конкурс эштәренә ҡарата ҡуйылған төп талап – архив документтарына һәм башҡа сығанаҡтарға таяныу.

Йәш тарихсылар араһындағы ижади бәйгелә еңеүселәрҙе тәбрикләү март аҙағында “Торатау” конгресс-холында ойошторола. Уҡыусылар, әйҙәгеҙ, Өфөбөҙҙөң тарихын, унда тыуып үҫкән йәки йәшәгән кешеләрҙең (яҡташтарығыҙ, туғандарығыҙҙың) шәхеснамәһен бергәләп яҙайыҡ! Һеҙҙең ғилми-тикшеренеү эшегеҙ Башҡортостандың баш ҡалаһы юбилейына күркәм бүләк буласаҡ!

Н. БУЛАТОВ.