Гүзәлиә Урал ҡыҙы һәм Лилиә Марс ҡыҙы, ҡотлайбыҙ!

Сараны асыу тантанаһында абруйлы ҡунаҡтар – “Ватан һаҡсылары” дәүләт фонды рәйесе Анна Цивилева, “Рәсәй халыҡтары ассамблеяһы” Бөтә Рәсәй ижтимағи-дәүләт ойошмаһының генераль директоры урынбаҫары Ирина Бабакова, “Бәхет биләмәһе” хәйриә фондының попечителлек советы рәйесе Каринэ Хәбирова, Башҡортостан Хөкүмәте Премьер-министры урынбаҫары - финанс министры Лира Заҡуан ҡыҙы Иғтисамова ҡатнашты.

Тәбрикләү һүҙе менән “Ҡатын-ҡыҙ – милләт әсәһе” конкурсына нигеҙ һалған, БР Халыҡтары ассамблеяһы рәйесе, БР Дәүләт Йыйылышы – Ҡоролтай депутаты, Башҡорт ҡатын-ҡыҙҙары йәмғиәте етәксеһе Гөлнур Ҡолһарина сығыш яһаны.

Шулай итеп, 10 номинацияла өсәр лауреат бүләкләнде: “Милләт әсәһе”, “Лидер”, “Мәҙәниәт”, “Медицина хеҙмәткәре”, “Ғалимә”, “Педагог”, “Бизнес-леди”, “Оҫтабикә”, “Көмөш ирекмән” һәм “Йәштәр лидеры”.

Йола буйынса, финалда 17 ҡатын-ҡыҙға Рабиға Ҡушаева исемендәге Башҡорт ҡатын-ҡыҙҙары йәмғиәте миҙалдары тапшырылды.

Шулар араһында гәзитебеҙҙең тоғро дуҫтары, башҡорт теле һәм әҙәбиәте уҡытыусылары “Педагог” номинацияһында еңеү яуланы.

Улар – Дүртөйлө районы Исмаил мәктәбенән Гүзәлиә Урал ҡыҙы Закирова, Салауат районы Байыҡ Айҙар исемендәге Арҡауыл мәктәбенән  Лилиә Марс ҡыҙы Иҙрисова.

Һеҙгә тыңғыһыҙ эшегеҙҙә уңыштар һәм һаулыҡ теләйбеҙ!