Күмертауға барып булмаһа ла...

Иң башта VII – VIII синыф уҡыусылары араһында «Кем ул Мортаза Рәхимов?» тигән һораулама үткәрҙек. Һөҙөмтәләр билдәле булғас, йөкмәткеле материал йыйып, ҡыҙыҡлы сығыш әҙерләргә, тигән маҡсат ҡуйҙыҡ. Эште архив материалдарын өйрәнеүҙән башланыҡ. Артабан тәүге Президентыбыҙҙы яҡындан белгән кешеләр, күренекле шәхестең туғандары менән бәйләнешкә сыҡтыҡ.
Эште йомғаҡлап, түбәндәге һығымтаға килдек. Мортаза Ғөбәйҙулла улы Рәхимов – республикала йәшәгән халыҡ, йәнтөйәгебеҙҙең үҫеше өсөн бихисап мөһим эштәр атҡар­ған шәхес. Беҙҙең Хәйбулла районы өсөн генә күпме көс түккән ул! Бөтә эштәр ҙә ойоштороусынан баш ала. Мортаза Ғөбәйҙулла улының тормошҡа ҡараштары – бөгөнгө быуынға ла үрнәк.
Тәүге Президентыбыҙ тыуыуына 90 йыл тулыуға арнал­ған конференцияға барырға буран ҡамасауланы. Тырышлығыбыҙ бушҡа булды, тип әйтмәйем. Етәксем Айгөл Рәшит ҡыҙы Рәсембәтова, икенсе фәнни-ғәмәли конференцияла ҡатнашырбыҙ, тип йыуатҡайны. Шулай килеп сыҡты ла: күптән түгел Стәрлетамаҡ ҡалаһына барҙыҡ. Рәшит Ниғмәтиҙең тыуыуына 110 йыл тулыуға арналған сарала ҡатнашып, унда II урын яулап ҡайттыҡ.

Зөлхизә ИСҠУЖИНА, йәш хәбәрсе.
Хәйбулла районы,

Аҡъярҙағы 3-сө киң профилле полилингваль мәктәп.