Иң шәп математиктар ҡайҙан?

Ойоштороусы ижади үҙәк – “Сикләнмәгән белем” (“Образование без границ”) етәксеһе Лилиә Миңлеғаян ҡыҙы Мусина әйтеүенсә, тәүге – дистацион этапта 5 меңләп уҡыусы ҡатнашҡан. Һуңынан үткәрелгән йәнә 4 этаптан һуң математиканы иң яҡшы белеүселәр генә ҡалған. Әйткәндәй, ярты йыл буйы эштәрҙе ирекмәндәр – 93-сө, 153-сө, 96-сы мәктәп һәм 3-сө гимназия уҡыусылары тикшергән.

Владимир Комаров исемендәге балалар ижады һарайына йыйылыусылар ныҡ тулҡынлана ине. Шулай итеп, IV синыфтар араһында призлы урындарҙы 93-сө мәктәп, Олипиада математикаһы үҙәге һәм Мостай Кәрим исемендәге 158-се башҡорт гимназияһы командалары бүлеште. V синыф уҡыусыларынан Әғзәм Фәйзуллин исемендәге 39-сы гимназия вәкилдәре иң-иңе булһа, икенсе урында – 18-се мәктәп, өсөнсөлә – “Сикләнмәгән белем” ижади үҙәге. VI синыф уҡыусылары араһында шул уҡ үҙәк тәүге урынды яулауға өлгәште. Икенсе һәм өсөнсө урындарҙа – 16-сы гимназия менән 45-се мәктәп. VII синыфтарҙан йыйылған командалар өсөн бәйге бигерәк ҡыҙыу барған – тәүге урынға ике белем усағы сыҡты: 161-се лицей менән “Сикләнмәгән белем” ижади үҙәге. Икенсе урын береһенә лә бирелмәне, өсөнсөлә – 123-сө лицей.

Еңеүсе командаларға бағымсыларҙан бүләктәр, грамоталар тапшырылды. Кескәй концерт та ҡарап һөйөндө уҡыусылар.