Башҡортостандың баш ҡалаһы Ҡариҙел һәм Ағиҙел йылғалары ҡушылған ерҙә урынлашҡан. 1574 йылда бейек ярымутрауҙа нигеҙ һалына уға.
Ағиҙел буйында Башҡортостандың Рәсәйгә ҡушылыуы хөрмәтенә мөһабәт монумент ҡуйылған. Ә алыҫ түгел ярһыу арғымаҡҡа атланып, Емельян Пугачёвтың тоғро юлдашы, башҡорт халҡының милли геройы, шағир-импровизатор Салауат Юлаев баҫып тора. Уға ҡарап һоҡланып туймайһың. Өфөлә халҡыбыҙҙың күренекле улдарының иҫтәлеген мәңгеләштергән һәйкәлдәр, тарихи урындар һанап бөткөһөҙ.
Уҡыу йылының һуңғы көнөндә синыфташтарым менән баш ҡалабыҙға юл тоттоҡ. Беренсе туҡталышыбыҙ Ағиҙел йылғаһы буйы булды – катерҙа йөрөнөк. Был минең өсөн беренсегә ине.
Артабан сәйәхәтебеҙҙе «Аҡбуҙат» ипподромында дауам иттек. Ашап алғас, бөйөк шағирыбыҙ Мостай Кәримдең һәйкәлен барып күрҙек. Ҡаланың сағыу мәҙәни үҙәге «Арт-КВАДРАТ»та фотоға төштөк. Шул уҡ көндә «Китап-байрам» бара ине, унда ла булыу бәхете тейҙе.
Һуңғы туҡталышыбыҙ лазер клубы булды. Синыфташтарым менән ике командаға бүлендек тә рәхәтләнеп «атыштыҡ». Унан инде шәп кәйеф менән Ишембайға ҡайтып киттек.
Минең өсөн Өфөнөң һәр бер урыны – үҙе бер мөғжизә.
Өфөм – илдең аҫыл бер ынйыһы,
Туғанлыҡ һәм дуҫлыҡ төйәге,
Башҡортостан атлы гүзәл ерҙең
Мәңге тибер дәртле йөрәге, – тип яҙған күренекле шағир Файыҡ Мөхәмәтйәнов.