Еңеүселәр билдәләнде

Бәйгебеҙ ҡыҙыу ғына барҙы, видеояҙмалар байтаҡ килде. Гәзитебеҙ өсөн махсус әҙерләнеп сығышын яҙҙырғандар айырыуса маҡтауға лайыҡ. Шуға еңеүселәрҙе билдәләү еңелдән булманы.

Редакция хеҙмәткәрҙәре бер нисә ҡатнашыусының тауышын, сәхнәлә үҙ-үҙен тотошон оҡшатып, еңеүсе итеп иғлан итә. Баймаҡ районынан Ильяс Әлмөхәмәтов, Бөрйән районы Брәтәк ауылынан Арыҫлан Вәлиев ҡыйыу ғына сығыш яһай икән. Ә Өфөнән Милана Дибаева үҙе гитарала уйнап, үҙе йырлап әсир итте.

Телеграм-каналда тауыш биреү ярҙамында һеҙ, дуҫтар, иң лайыҡлы йырсыларҙы һайланығыҙ. Рәхмәт! Айырым башҡарыусылар араһынан – Ҡырмыҫҡалы районы Алайғыр ауылынан Фидалиә Ирмәкова, ансамблдәрҙән Әбйәлил районы Асҡарҙан (Таһир Күсимов исемендәге гимназия) “Ете ҡыҙ” бүтәндәрҙе әллә күпме тауышҡа артта ҡалдырҙы.

Йәмил Баймырҙин иһә бөтә йырсылар араһынан Стәрлетамаҡ ҡалаһынан Айлина Дәүләткилдинаның сығышын оҡшатты.

Ҡотлайбыҙ! Еңеүселәргә Ябай Малайҙан календарь, редакцияның иҫтәлекле бүләге һәм Почёт грамотаһы тапшырыласаҡ. Ә Йәмил Баймырҙин менән осрашыу көнөн саҡ ҡына һуңыраҡ билдәләрбеҙ. Ул еңеүселәр менән күрешергә вәғәҙә биргәйне.

Афарин, дуҫтарыбыҙ! Конкурстарыбыҙ күп, ҡатнашып тороғоҙ!