Уңыштар, Таңсулпан!

Таңсулпанға әле 9 йәш, уның ике апаһы һәм бер ҡустыһы бар.Ҡыҙ әлеге ваҡытта Әбйәлил районының Буранғол мәктәбендә IV синыфта белем ала.

Таңсулпан бәләкәй сағынан йыр-бейеүгә әүәҫ. Унһыҙ мәктәптә бер сара ла үтмәй, сәхнәне дер һелкетеп концерт ҡуя, йырын да йырлай, бейеүен дә бейей, шиғыр-әкиәт һөйләргә лә бик әүәҫ.

Уҡыу яғынан да һынатмай өлгөр ҡыҙ. Яҡшы уҡыуы, өлгөлө тәртибе, мәктәп тормошонда әүҙем ҡатнашҡаны өсөн 2024-2025 уҡыу йылында "Йыл уҡыусыһы" исемен алып, аҡсалата премия менән бүләкләнә. Уны хаҡлы ялда булған уҡытыусы Ғәлиә Зәйнетдин ҡыҙы үҙ исеменән тапшыра.

Таңсулпандың Диплом, грамота, Маҡтау ҡағыҙҙарын һанап бөткөһөҙ, шуларҙың ҡайһы берҙәрен яҙып үтәйек. Район буйынса үткән "һаумы, һаумы, әкиәт!" конкурсында - I урын ала, Бөйөк Ватан һуғышы иҫтәлегенә арналған район буйынса үткәрелгән шиғыр конкурсында - I, йыл һайын Юрий Гагарин олимпиадаһында ҡатнашып призлы урындар, значоктар менән бүләкләнеп тора.

Cиләбе өлкәһе Магнитогорск ҡалаһында Эмма Тимерғәзина иҫтәлегенә үткәрелгән "Урал гүзәле" бәйгеһендә финалға үтеп, Силәбе ҡалаһына юллана. Унда төрлө төбәктән килгән ҡыҙҙар менән көс һынашып, " Урал гүзәле-2025 " еңеүсеһе була.

Быйыл тырыш ҡыҙ район үҙәгендәге "Һомай-Урал аръяғы" модель студияһына йөрөй башланы. Уны Зарина Фәрит ҡыҙы Йәнбирҙина етәкләй. Ҡыҙ мода серҙәрен үҙләштерә. Яңы ғына район буйынса үткәрелгән "Әбйәлил Ҡарһылыуы"нда Гран-при алып, үҙ көсөн республика буйынса һынап ҡарарға була. Өфө ҡалаһында ла "Ҡарһылыуҡай -2025" конкурсында һынатмай, Мәскәүҙә үтәсәк конкурста ҡатнашыу өсөн путевка, 120 000 һумлыҡ сертификат менән бүләкләнә.

Таңсулпан синтезаторҙа уйнарға, йырларға ярата. Ләйсән Ринат ҡыҙы Моратова етәкләгән бейеү түңәрәгенә йөрөй, еңел атлетика менән дә мауыға. Таңсулпандың иң ҙур теләге - махсус хәрби операция тиҙерәк тамамланһын. Ул шул хәтлем һалдаттарҙы йәлләй, ярҙам итеү пунктарына йөрөй, йыш ҡына үҙенә тип йыйған аҡсаһын һәм төрлө әйберҙәр тапшыра, хәйриә концерттарында ла ҡатнашып үҙ өлөшөн индерә.

Таңсулпандың еңәһе үрҙәре алда булһын. Киләсәктә үҙен ҙур артист, модель итеп күрә. Яҡындары уның менән бик ғопуплана.