«Шағир кешеләрҙең йөрәгендә йәшәй» әҙәби марафоны

Зал шиғриәт һөйөүселәр менән тулы ине. Марафонда ҡатнашыусылар шағирҙың шиғырҙарын һөйләне, ә тамашасылар иғтибар менән тыңланы. Минең III синыф уҡыусыларым да  илһамланып шиғыр һөйләне. 
      Хөрмәтле ҡунаҡтарҙың ҡотлауҙары айырыуса тулҡынландырғыс булды.
«Шағир йөрәктәрҙә йәшәй» төркөмө етәксеһе Миҙхәт Хәбибулла улы Вәлитов Рәшит Назаров тураһында хәтерҙе һаҡлап ҡалыу һәм уны киләһе быуындарға тапшырыу ни өсөн мөһимлеген барыһына ла иҫкә төшөрҙө.
Шағирҙың туғаны Зөлфиә Хөсәйен ҡыҙы Назарова йылы ғаилә хәтирәләре менән уртаҡлашты. Уның ихлас һүҙҙәре залдағы һәр кемгә тәьҫир итте. Әлфиә Нәжип ҡыҙы Әсәҙуллина, беҙҙең талантлы яҡташыбыҙ, шағирә, Башҡортостандың һәм Рәсәйҙең Яҙыусылар союзы ағзаһы, Башҡортостандың атҡаҙанған матбуғат һәм киң мәғлүмәт хеҙмәткәре, Ғәлимйән Ибраһимов исемендәге премия лауреаты, Рәшит Назаровтың ижады, китаптарының нисек баҫылып сығыуы тураһында һөйләне.
Вәрис Йәғәфәр улы Аҡбашев, яҙыусы, шағир һәм «Зәңгәр шишмә» район әҙәби берекмәһе рәйесе, йәмғиәт тормошонда шиғриәттең әһәмиәтен һәм мәҙәни традицияларҙы һаҡлауҙа бындай сараларҙың ролен һыҙыҡ өҫтөнә алды.
Ғәлимйән Ибраһимов исемендәге премия лауреаты, китапхана хеҙмәте ветераны Замера Ғиндулла ҡыҙы Хөсәйенова Рәшит Назаровтың милли әҙәбиәткә индергән өлөшөн билдәләне һәм марафонды ойоштороусыларға рәхмәт һүҙҙәрен әйтте.
Төрөмбәт ауылында йәшәүсе хеҙмәт ветераны Гөлфиә Нурғәли ҡыҙы Ханнанова шиғриәт һәм уның кеше күңеленә йоғонтоһо тураһында уйланыуҙары менән уртаҡлашты.
Был кисәлә ҡатнашыусылар үҙҙәренең шиғырҙарын уҡыны. Рәшит Назаровтың билдәле шиғырҙары, уның ижадынан рухланып яҙылған автор юлдары ла яңғыраны. Был кисә тағы бер тапҡыр Рәшит Назаровтың ижады кешеләрҙең йөрәгендә йәшәй, ә уның шиғырҙары яңы быуындарҙы илһамландырыуын дауам итеүен күрһәтте.
Шиғриәт байрамын ойоштороусы музей хеҙмәткәрҙәренә рәхмәт һүҙҙәрен еткерәм.

Айгөл САТЛЫҠОВА, башланғыс синыфтар уҡытыусыһы.

Ауырғазы районы, Рәшит Назаров исемендәге Талбазы башҡорт гимназияһы.