Магнит ҡалаһына сәйәхәт

Ниһайәт, ҡалаға килеп еттек. Аквапарк бинаһына ингәс, синыф етәксебеҙ Гөлнара Әхмәтхан ҡыҙы Ғүмәрова ентекле итеп хәүефһеҙлек ҡағиҙәләрен аңлатты.
Ниндәй генә аттракцион юҡ бында! Джакузи, фонтан, һыу ағып торған тауҙар, тарзанкалар... Өс сәғәт ваҡытыбыҙ «һә» тигәнсе үтеп тә китте. Асығып та кителгән икән. Шуға икенсе туҡталышыбыҙ ашханала булды. Рәхәтләнеп, нимә теләйбеҙ, шуны алып ашаныҡ.
Артабан ҡаланың Еңеү паркында Бөйөк Ватан һуғышы хәтирәләренә бирелдек. Синыф етәксебеҙ «Тыл – фронт­ҡа» тигән мөһабәт монумент тарихын һөйләне. Уралда ҡойолған ҡылысты Волгоградта Ватан-әсә юғарыға күтәргән, ә Берлинда Еңеүҙән һуң совет һалдаты ҡоралын түбәнгә төшөргән икәнен белдек. Илназ менән Анэлия Волгоградта Ватан-әсә һәйкәлен күреүҙәрен әйтте.
Сәйәхәт беҙгә бик оҡшаны. Уҡыу йылын ошолай күңелле итеп тамамлауға күп көс һалған Гөлнара Әхмәтхан ҡыҙына, ата-әсәләребеҙгә рәхмәт әйтәбеҙ.

Диана АЛЛАЯРОВА.
Учалы ҡалаһы,
Сабир Йыһаншин исемендәге
1-се башҡорт лицейы.