Рәхмәт ҡағыҙы алып һөйөндөм

Тәүге этапта уңышлы сығыш яһап, йомғаҡлау өлөшөндә һынау тоттом. Бик ныҡ ҡыуандым да, бер аҙ тулҡынландым да. Республикабыҙҙың төрлө ҡала, райондарынан, хатта күрше өлкәләрҙән дә иң-иңдәр йыйылғайны бит сәсәндәр бәйгеһенә.
Был конкурс ва­ҡытында үҙемә дуҫтар, яңы таныштар таптым. Улар барыһы ла рухлы, шәп малай-ҡыҙҙар ине! Сәсәниә Розалиә Солтангәрәева апай беҙгә үҙенең теләктәрен еткерҙе. Уның әйткәндәрен һәр саҡ иҫемдә тотасаҡмын.
Дүртенсе Халыҡ-ара китап байрамында ла булып өлгөрҙөк. Хатта сәсәндәр тирмәһендә «Урал батыр» эпосынан өҙөк башҡарып, Рәхмәт хаты ла алып һөйөндөм.
Өфөнән рухи көс туп­лап, дәртләнеп ҡайттым. Атай-әсәйемә, уҡы­тыусыма ҙур рәхмәт! Шулай матур ғына башланып китте минең каникулым. Алдағы көндәремде лә күңелле, фай­ҙалы уҙғарырмын.

Әҙилә АҘНАБАЕВА, V cиныф уҡыусыһы.
Ауырғазы районы, Рәшит Назаров исемендәге Талбазы башҡорт гимназияһы.