Яңыраҡ беҙ, һигеҙенселәр, оҙаҡ йылдар мәктәптә тарих һәм йәмғиәтте өйрәнеү фәненән уҡытҡан, мәктәбебеҙҙең тыуған яҡты өйрәнеү музейының етәксеһе булып эшләгән Миңзәлә Фәтҡуллина инәйгә ярҙам итергә барҙыҡ. Ул беҙҙе ихлас ҡаршы алды.
Алтынай Ҡасимова менән Гүзәл Сәйфетдинова барып ингәс тә ҡулдарына көрәк алып, ҡапҡа эсендәге һәм тышындағы ҡарҙы көрәй башланы. Буранбай Дауытов менән Шайморат Ғөбәйҙуллин санаға утын тейәргә тотондо. Эш дәррәү барҙы. Динис Ғәбиҙуллин, Батырйән Хурамшин, Азалиә Хисаметдиновалар сылбыр кеүек теҙелеп, утынды бер урынға ташыһа, ә Айгөл Зәйнишева менән Лиана Мәхмүтова матур итеп өйөп ҡуйҙы.
Боронғолар юҡҡа ғына: «Күмәкләгән яу ҡайтарған», – тип әйтмәгән. Эшебеҙ ырамлы барҙы. Бер арба утынды «һә» тигәнсе өйөп, инәйҙең ишек алдын, ҡапҡа эргәһен ҡарҙан таҙартып ҡайтып киттек. Миңзәлә инәй беҙгә рәхмәттәрен әйтеп, матур теләктәрен теләп оҙатып ҡалды. Уның йөҙө ҡояштай балҡый ине.
Фирзәлиә ҠАРАМЫШЕВА,
йәш хәбәрсе.
Бөрйән районы,
Әбделмәмбәт мәктәбе.